Stipend til unge lovande

Eit av dei lokale talenta var bowlingspelar Gaute Øye Melstveit. Dei siste åra har han trena hardt og målretta mot meisterskapar og andre turneringar.

Styreleiar Gunnar Skeie i stiftinga, som sjølv stilte opp i bowlinghallen i Øystese fredag kveld for å dela ut stipendet, opplyser at det er fyrste gong det vert delt ut stipend til ein bowlingspelar. Skeie er imponert over kor langt ein kan nå innan sporten.

— Me har vel alle prøvd å kasta den kula, sa styreleiaren.

Melstveit seier at han ikkje held elitenivå kvar gong han bowlar.

— Når eg spelar med kompisar, ligg eg berre litt over snittet, forsikrar han.

Betre tilgang

Det siste året har det vorte få konkurransar på Melstveit. Det har tidvis vore tungt å driva når ein ikkje har hatt noko mål å trena mot. Alle store turneringar har anten vorte avlyste eller utsette. Han ser difor fram til å kunna få reisa på sommarleir saman med andre unge utøvarar frå heile landet. Den skal gå av stabelen i Solør fyrste veka i juli.

— Det er kjekt at det endeleg skjer noko, seier Melstveit.

I fjor byrja han som lærling, og det har gjort at han kan spara litt pengar til å satsa endå meir på bowlinga. Etter at han fylte 18 år, har det òg vorte lettare for han å trena. Melstveit har nemleg fått eigen nøkkel slik at han kan øva når det passar han. Det har dessutan vorte lettare for den unge kometen etter at Kvam bowlingklubb fekk nytt utstyr.

— No kan eg tilpassa banen etter mine behov og ynske, seier 18-åringen frå Øystese.

Melstveit er blant dei beste bowlarane under 21 år i Noreg, og i fjor vart han beste spelar i Bergen bowlingkrins. Dei argaste konkurrentane kjem frå andre delar av landet.

Bergen bowlingkrins er ifylgje han den minste krinsen målt i talet på aktive ungdomsutøvarar. Melstveit trur stipendet kjem godt med når landet opnar att og dei store meisterskapane tek til.

— Ser kva som opnar seg

Ikkje berre idrettsutøvarar kan få stipend. Også songar Maria Leonora Lilleås frå Norheimsund fekk stipendet på 30.000 kroner for si satsing innan song og scenekunst, som ho har brunne for lenge.

— Eg har drive med det heilt sidan eg kom ut av magen, seier ho og ler.

Ho vart inspirert til å begynna på kulturskulen i ung alder. Der var ho innom det meste som hadde med song og scene å gjera. Lilleås har delteke i Ung kultur møtast (UKM) fleire gonger.

Aller mest kosar ho seg når ho syng jazz. Ho har gått tre år på Kongshaug Musikkgymnas, der har ho fått mykje god erfaring. Ho håpar på ein karriere innan kulturen, men veit at nålauga er trongt.

— Eg ynskjer å sjå tilbake på eit liv der eg prøvde å nå draumane mine, seier den talentfulle songaren.

Til hausten skal Lilleås starta på musikkteaterlinja ved Bårdar Akademiet i Oslo. Stipendet kjem godt med til innkjøp av utstyr til utdanninga. Ho ser fram til å kunna studera det ho verkeleg brenn for.