Stilte til start trass vind og snø
Forholda var ikkje dei beste då Jondal Idrettslag omsider fekk arrangert lysløyperenn nummer to. Likevel stod 34 skiløparar på startstreken.
Renn nummer to skulle eigentleg ha gått av stabelen i slutten av januar. Dårleg vêr gjorde at rennet vart avlyst. Vêret var heller ikkje perfekt då rennet til slutt vart arrangert fredag kveld. Snøen lava ned og vind gjorde at snøflaka til tider gjekk meir sidelangs enn rett ned.
– Snøen og vinden gjorde at eg fekk vondt i augo, fortel Ivar Espeland, ein av deltakarane.
– Likevel gav eg alt og tykkjer det gjekk bra.
At han gav alt, kan HF skriva under på. Han var ein av fleire unge deltakarar som etter målgang vart liggjande i snøen og hiva etter pusten.
Vêr og ferie
34 startande er ifølgje Svein Olav Espeland, leiar i skigruppa til Jondal Idrettslag, under snittet på om lag femti.
Han trur at vêret har litt av skulda, men meiner at også at den føreståande vinterferien kan ha hindra større frammøte.
– Mange har nok valt å reisa vekk framfor å gå lysløyperenn, seier han.
Espeland fortel at klubben har arrangert lysløyperenn i fleire tiår. Renna er viktige for å halda vinteraktiviteten i idrettslaget oppe.
– Lysløyperenna går alltid om kvelden på fredagar. Det er noko eige å gå renn når lysa er tende. Det vert ei eiga stemning, seier han.
Små og store
Dei fleste deltakarane på lysløyperenn nummer to var under 16 år. Det er som vanleg.
– Tendensen er at dei små dominerer. Det tykkjer eg berre er positivt. Rekrutteringa skjer i barneåra. Mange fell frå når dei vert ungdomar. 1990-talet var ei veldig god tid for skimiljøet i Jondal. Me må nok berre innsjå at det er fleire ting som konkurrerer om ungdomen i 2024, seier Espeland.
Dei einaste vaksne deltakarane var tre karar i klassen for menn frå 43 til 49 år. Espeland fullførte på tida 19.40, og vart den raskaste av dei vaksne. Det ikkje er kvardagskost.
– Eg hadde vel litt flaks denne gongen, sidan det var få vaksne deltakarar, seier han.
Avlysingar har altså gjort at lysløyperenna ikkje kom i kronologisk rekkefølgje. Idrettslaget arrangerer fem lysløyperenn. Renn nummer fem vart arrangert førre helg. Lysløyperenn tre, som også vart avlyst, skal etter planen gå av stabelen komande helg.
– Dersom vêret tillèt det, påpeikar Espeland.
Sundag 25. februar vart lagsmeisterskapen avvikla i fine løyper. 41 deltok. May Randi Haugen Selsvik og Olav Hetlevik Handegard vart lagsmeister i seniorklassane, opplyser idrettslaget på heimesida.
