Starta seriespelet med siger
Rossvoll-damene kunne jubla etter den første kampen i 2. divisjon.
Laget frå Kvam slo laurdag Søre Neset 3–0. Kampen vart spela i Framnes Arena, sidan det var husflidsmesse i Øystesehallen.
Spelande trenar Hege Buene var glad etter kampen.
– Det tok litt tid før me kom skikkeleg i gang, men utover i kampen følte eg at me hadde god kontroll. Spelarane har ikkje spela lenge saman, og eg tykkjer det er kjekt å sjå at me klarar å kommunisera. Dette betyr at me har fått eit godt utgangspunkt for resten av sesongen. No gjeld det å halda fram med å spela slik me spela i denne kampen, seier ho.
– Målet er å vinna
Ho trur ikkje laget frå Nøre Neset vert ein kasteball i serien.
– Dette er eit lag med mange rutinerte spelarar som har spela saman lenge. Du merkar at dei er flinke til å plassera ballane. Me har tapt mot Søre Neset tidlegare, seier ho.
Buene fortel at damelaget til Rossvoll består av ei blanding av elevar frå Kvam vidaregåande skule, Framnes Kristne Vidaregåande Skule og eldre spelarar.
Sesongmålet er å vinna divisjonen. Om laget klarar det, kan damene spela i 1. divisjon neste sesong. Det er eit tilbod laget eventuelt vil takka nei til.
– I 1. divisjon må ein spela mot lag frå heile Noreg. Spelarane har ikkje tid til så mykje reising. Me trivst veldig godt i 2. divisjon, fortel ho.
Herrelaget vann
Også herrelaget til Rossvoll spela kamp i Framnes Arena på laurdag. På andre sida av banen stod Sarpsborg. Laget frå Kvam vann 3–2. Kampen var den 4. laget spelar i 1. divisjon denne sesongen, og sigeren var den første.
Trenar og lagleiar Jon Erlend Haukås fortel at laget byrja kampen dårleg, men fann rytmen etter kvart.
– For oss var dette ein viktig siger. Sarpsborg har tapt alle kampane i år, og me visste at dersom me vil halda på plassen i 1. divisjon, var det viktig å vinna denne kampen, seier han.
Haukås meiner Rossvoll har eit sterkt lag når dei dei beste spelarane stiller. Når desse ikkje er tilgjengelege, må klubben fylla på med unge spelarar.
– Mange av dei har knapt nok spela på seniornivå før. Dessutan er mange nye i laget, slik at relasjonane framleis ikkje sit heilt. Eg trur me vil verta sterkare utover i sesongen, seier han.
