Starta påsken med ski på beina
Små og store heiv på seg ski og stavar og vart med på Fodnastølsrennet i Herand palmesundag, nesten femti år sidan sist det vart skipa til.
32 born, unge og vaksne fresa rundt i skiløypa ved Fodnastøl med startnummer på brystet då Herand Idrettslag arrangerte Fodnastølsrennet sundag.
Eit koserenn
Skiløparane i klassen for born og unge til og med 8. klasse gjekk ei lita løype i området ved skibua. Dei som var hakket eldre, tok runden om Lomatjørn.
– Det var godt frammøte til ikkje å vera eit «full fart-løp», seier Hildegunn Samland.
Ifylgje Samland, som er leiar i idrettslaget i Herand, var rennet uhøgtidleg og ope for alle.
– Tanken var at det skulle vera eit koseløp som ville vera kjekt for både små og store, seier Samland.
Ho fortel at fleire av dei eldste deltakarane ikkje plar gå på ski til vanleg, og at nokre av dei hadde kommentert at det var fyrste gong dei hadde ski på beina denne sesongen. Medan nokre stilte opp på langrennsski, nytta andre fjellski.
Margreta Sandvin Eiken syrgde for at alle som var til stades, fekk seg ei nysteikt mjølkekake. Til saman hadde ho steikt 70–80 lappar, og alle var vekke då arrangøren pakka saman etter løpet.
Gamal tradisjon
Ifylgje Samland er det nærare 50 år sidan Fodnastølsrennet sist vart skipa til. Rennet, som tidlegare har vore ein tradisjon å stella i stand, stoppa opp kring 1975.
– Det har vore snakk om å starta det opp att i mange år, så det var veldig kjekt at me fekk det til no, seier ho.
Tilbakemeldingane etter rennet var gode, ifylgje Samland. I tillegg kom det innspel til neste års skirenn.
– Det var nokon som sa at dei skulle stilla opp i kyllingkostyme neste år, så kanskje det vert eit kostymerenn då? fortel ho.
