Stakk av med samanlagtsigeren: – Trudde ikkje det skulle gå så bra

Då Kristiansands Cykleklubb arrangerte Sørlandet Petit Prix, var 16-åringen frå Vikøy ein av dei som stilte på startstreken. På programmet stod ein prolog og eit rundbaneløp i Kristiansand laurdagen, og ein fellesstart i Grimstad sundagen. Etter dei tre etappane i rittet var det Pedersen som stakk av med samanlagtsigeren.

Pedersen seier at det var ei digg kjensle å vinna eit ritt samanlagt. I tidlegare ritt har han vunne enkeltetappar, men det å hamna øvst på pallen etter å ha fullført tre løp på to dagar, var ekstra stort for kvemmingen.

I prologen var det krevjande tilhøve med regn og glatt vegbane, men Pedersen kom seg heilskinna gjennom etter ein tøff kamp om plassane over 1,7 kilometer på ei gokartbane. For 16-åringen var det full spurt heile vegen som gjaldt, og sjølv om mjølkesyra kom snikande, lukkast han med å halda jamt tempo heile vegen. Han leverte eit godt løp, kor han til slutt hamna på ein 4.-plass, delt med fire andre konkurrentar. Sjølv var Pedersen overraska over det gode resultatet.

— Eg er eigentleg ein sprintar, men eg trudde ikkje det skulle gå så bra. Eg hadde meir å køyra med på slutten, men fekk ikkje spurta med det eg hadde sidan eg blei sperra inne, seier han.

Nokre timar seinare var det rundbaneritt som stod for tur. Dette har vore Pedersen sitt største mål for sesongen, då det var ei løype som skulle passa han godt. På startstreken stod nærare 70 syklistar. Mellom etappane hadde gokartbana tørka opp, noko kvemmingen var glad for. Han fortel om tidlegare år, der det på grunn av glatt vegbane har enda med massevelt og nøytralisering av ritt. I fjor krasja han og måtte venda nasen heim med knekt sykkel. Dette året kom han seg heilskinna til mål, nokolunde nøgd med etappen.

— Eg køyrde bra heile vegen, og heldt meg framme i feltet for å unngå velt. Då det var ein halv runde att, stoppa heile feltet opp, og eg blei sperra inne. Eg måtte ta ein lang yttersving då me nærma oss målstreken, og låg på 10.-plass då spurten starta. Alt blei rotete, så eg er ikkje nøgd med inngangen til spurten. Det var kaotisk, og posisjoneringa hadde alt å seia. Den som låg fyrst ut av svingen, ville vinna.

Pedersen spurta seg til slutt opp på ein 7.-plass.

Beste tid samanlagt

Arrangementet, som gjekk over to dagar, vart avslutta med ein fellesstart i Grimstad. Pedersen fortel om ein dag der vêret spela på lag og nervane var under kontroll. Undervegs i den 68 kilometer lange etappen var det fleire av favorittane som gjorde mislukka forsøk på å gå i brot tidleg i rittet. Då kvemmingen og fire andre konkurrentar prøvde å lausriva seg frå feltet, var det ingen som forsøka å ta att utbrytargruppa. Pedersen trur dei fekk gå fordi dei var underdogs, og meiner sjølv at dei var heldige som lukkast med brotforsøket. 16-åringen er godt fornøgd med kvintetten han hamna i og jobben dei gjorde saman.

— Det var veldig gøy. Me fekk til eit godt samarbeid og køyrde jamt. Feltet bak sleit med å samarbeida, og til slutt fekk me ei så stor luke at feltet gav opp jakta. Då me såg at me fekk lov til å gå, skjøna me at ein av oss i brotet kom til å vinna samanlagt, seier Pedersen.

Ein liten bakke, kring ein kilometer før mål, skulle visa seg å verta avgjerande. Ein av konkurrentane i utbrytargruppa rykte frå, og Pedersen var den einaste som makta å hengja seg på. På oppløpssida starta kvemmingen spurten akkurat for seint til å ta sigeren, og enda opp eit halvt hjul bak vinnaren.

Med andreplassen etter fellesstarten kunne 16-åringen frå Vikøy stå øvst på pallen etter dei tre etappane. Han enda opp med den beste tida samanlagt, seks sekund framfor Felix Ørn-Kristoff (Stavanger SK).

God oppkøyring

Treningsperioden fram mot sesongstart er Pedersen godt nøgd med. Han fekk lagt eit solid grunnlag i vinter, med mange gode intervalløkter heime på «rulla». Utpå våren fekk syklisten kjenna på effekten av øktene. Han har stort sett vore frisk og skadefri, sett bort frå nokre kneplager i mai.

I tillegg til alle treningstimane Pedersen har hatt på sykkelen heime i Kvam, har han delteke på om lag tjue ritt for syklistar på Vestlandet, i regi av Norges Cykleforbund Region Vest. Dette har sørgt for at kvemmingen har fått god rittrening. I andre delar av landet har det vore strengare mindre spelerom som fylgje av koronarestriksjonar, så Pedersen er takksam for sykkelritta Region Vest har arrangert.

Drøymer om proffkontrakt

Pedersen var ferdig på Kvam ungdomsskule i juni, og har no flytta til Lillehammer for å satsa på sykkel. 16-åringen har fått plass på Noregs Toppidrettsgymnas, og reiste tilbake til Lillehammer etter fellesstarten sundag.

— Du har no starta på NTG. Korleis har fyrste veka vore?

— Det har vore veldig gøy, mykje betre enn venta. Folka er bra og skulen er bra. Alle som er her har same, felles interesse — å trena. Det gjer at alle elevane er seriøse og at alle har respekt for kvarandre og det ein driv med. Me får trenarar som er veldig gode, og skulen legg godt til rette for elevane. I tillegg er det gode treningsforhold her, med mange vegar å sykla på og lite trafikk. Heime har eg hatt vaksne som eg har sykla med, og det har vore gøy, men her får eg sykla med nokon på min eigen alder. Tidlegare i veka var me mellom 20 og 25 syklistar på trening saman — det gjorde treninga mykje kjekkare.

— Kva er planane framover? Har du nokre hårete mål?

— Mitt langsiktige mål er å få ein proffkontrakt med eit profflag. Det er det eg har mest lyst til. Eg har ingen spesifikke mål elles, målet er berre å bli betre og å få eit godt grunnlag. Eg har små mål som gjeld enkelte ritt, men det tek eg undervegs.

For 16-åringen er draumen å kunna satsa heilt og fullt på sykkel, som er ein dyr sport. Utstyr, reising og deltakaravgift er nokre av utgiftene, og Pedersen er glad for å ha Lingalaks AS i ryggen som sponsor. Det hjelper til med at han får reisa rundt i landet og delta på sykkelritt.

Til helga ventar eit nytt ritt for den unge syklisten, denne gongen i Kongsvinger.