Spurta i solskinet
Søstrene Jenny (12) og Emilie (14) Samland vann kvar sin klasse i Herand rundt. Det har dei stort sett alltid gjort, men snart spring dei i same klasse.
Trass den unge alderen deira er begge Herand rundt-veteranar.
– Me har sprunge kvart år sidan me var gamle nok, fortel Emilie.
Jenny sprang den blå løypa, altså løypa for dei som er 11–12 år gamle. Emilie sprang den kvite løypa, som er løypa for dei mellom 13 og 16 år. Begge to kom først i mål med god margin. Ifølgje jentene er ikkje det noko nytt.
– Eg pleier å vinna den klassen eg spring i, fortel Emilie.
– Det pleier eg òg, fortel Jenny.
– Likar å springa
Jentene spring ikkje berre Herand rundt, men har i tillegg delteke på fleire friidrettsstemne.
– Kvifor er de så raske?
– Eg likar å springa og trenar ofte. Eg spring fleire gonger i veka, fortel Emilie.
– Eg trenar litt av og til. Eg spring kanskje ein gong i veka, seier Jenny.
– Kva ambisjonar har de?
– Då eg var lita jente, var draumen å verta noregsmeister, men eg tenkjer ikkje på det no. Eg spring fordi eg likar det, seier Emilie.
– Eg har lyst til å verta god, men veit ikkje om eg har ambisjonar, seier Jenny.
Om ikkje lenge kjem dei til å springa Herand rundt i den same klassen.
– Då slår nok konkurranseinstinktet inn, og det vert mykje trening for å slå den andre. Eg trur at eg kjem til å vinna, seier Emilie.
– Eg trur kanskje òg at ho kjem til å vinna, seier Jenny.
– Fleire enn i fjor
Herand rundt gjekk tradisjonen tru av stabelen 2. pinsedag. Start og mål var ved kulturhuset i Herand. Leiar i Herand Idrettslag, Martin Åsen, fortel at løpet vart arrangert for 41. gong.
Skrivar i laget, Kjell Olav Samland, fortel at som vanleg var det ei eiga trimløype for dei som berre ville kosa seg i finvêret, og 5 konkurranseløyper. Lengda på løypene auka med alderen på deltakarane. Den for dei mellom 0 og 6 år var berre eit par hundre meter lang, medan dei vaksne sprang om lag 4 kilometer.
Om lag 225 deltok i trimklassen, medan 65 tevla. Det betyr at det til saman var om lag 290 deltakarar. Det er ifølgje Samland fleire enn i fjor.
– Det skuldast nok at vêret var betre og at mange var på besøk i bygda, seier han.
Herand har ifølgje Åsen om lag 218 innbyggjarar. Då seier det seg sjølv at ein del av deltakarane var tilreisande.
– Me hadde hengt opp plakatar i Norheimsund, Odda, Utne og på Voss. I tillegg er nok ein del utflyttarar attende i heimbygda i samband med pinsen. Eg trur òg ein del som har hytte i området, har delteke, seier han.
