Sprinta på isen i byd'n
Det vart sett fleire personlege rekordar og fine resultat av skeiseløparar frå Hardanger Skøyteklubb på Slåtthaug kunstisbane i Bergen nyleg.
Det opplyser leiar i klubben, Brynjulf Måkestad, i ei pressemelding. Krinsmeisterskapen i sprint vart avvikla 19. februar og 20. februar.
Eric Clement frå Norheimsund vart krinsmeister i klassen 40—45 år. Han gjekk 500 meter på 54,06 og 1000 meter på 1.50,12 fyrste dagen. Andre dagen gjekk han 500 meter på 56,14 og 1000 meter på 1.47,33. Samanlagt fekk Clement 218,925 poeng. Han hadde ikkje konkurranse i klassen.
Det har vore vanskeleg med istrening for borna lokalt i vinter på grunn av lite kulde. I tillegg har koronapandemien gjort alt meir krevjande, fortel Måkestad.
Klubben har hatt ei gruppe på åtte born som har pendla til Slåtthaug ein gong i veka. På grunn av viruset har det vore eit noko redusert tal deltakarar frå klubben.
Neste krinsløp er laurdag 26. februar.
