Spring i rosa for viktig sak
Sissel Grinde Sandven er ein av mange som har fått diagnosen brystkreft. Onsdag stiller ho til start når det skal springast til inntekt for kreftsaka.
– Ein vert jo ekstra engasjert når ein sjølv vert råka, seier Sandven.
Når Hardanger Trening arrangerer Rosa sløyfe-løpet i Norheimsund onsdag, er Sandven ein av deltakarane. Ho tykkjer det er fint at nokon skipar til ei slik markering i bygda.
– Det er mange som vert råka av brystkreft, så det er ei viktig sak. Ein betalar jo litt for å vera med, men det er ei fin gåve til kreftforskinga, seier ho.
Aktiv deltakar
Saman med døtrene har ho delteke på løpet i Bergen i 2017—2019. Då pandemien sette ein stoppar for tilstellinga i 2020, tok ho saka i eigne hender og inviterte veninnegjengen til ei uhøgtidleg markering på Sjusete.
I fjor tok treningssenteret over Spar-butikken i Norheimsund på seg jobben med å arrangera løpet. Då vart Sandven verande i bygda.
– Det er jo veldig greitt å sleppa å reisa til by’n, seier ho.
– Har vore heldig
I år er det 11 år sidan Sandven fyrst oppdaga ein klump i det eine brystet. Då ho nemnde det for mannen, fekk ho klar beskjed om å få han undersøkt. «Dette er ikkje noko å utsetja», sa han.
Sandven vart vist til Haukeland universitetssjukehus. Der vart det konstatert at ho hadde brystkreft.
– Eg tenkte at dette måtte gå fint. Det vart trass alt oppdaga tidleg, fortel Sandven.
Etter operasjon, fleire rundar med cellegift i perioden august–desember 2011, årlege mammografiundersøkingar og beintettleiksmålingar fortel kvemmingen at ho har vore heldig. Ho må dagleg ta tablettar mot beinskøyrheit, men har heile vegen vore i fin form.
– Eg er ikkje den som er på treningssenteret, men eg går ein del turar, seier kvemmingen.
Eit lågterskelløp
Anette Tyssebotn, som jobbar for Hardanger Treningssenter, planlegg Rosa sløyfe-løpet saman med kollegaene Maria Fagerbakke Skeie og Marit Rogde. Då den same gjengen inviterte til arrangementet i fjor, var det kring 200 personar som kom seg ut i regnet og deltok.
Tyssebotn fortel at dei gjorde seg nyttige erfaringar som dei tek med seg i årets planlegging. Mellom anna vil dei endra måten dei skal dela ut startnummer på.
– I fjor vart det mykje venting, og enkelte vart kalde i regnet. I år vil me syrgja for at den delen skal gå kjappare, seier ho.
Løypa, som går via Gamle Sandvenvegen og til Kaldestad, er den same som i fjor, og deltakarane kan velja om dei vil leggja bak seg tre eller seks kilometer. Årsaka til at dei nyttar strekkja, er at det skal vera eit lågterskeltilbod, forklarar Tyssebotn. Løypa er flat og skal passa for alle – både for dei som går, joggar eller trillar.
– Kvifor arrangerer de løpet i år òg?
– Me ynskjer å ha fokus på eit viktig tema som betyr mykje for mange og samla inn pengar som kan nyttast til forsking. Og så er det kjekt å laga til eit arrangement som samlar bygdene. Det at me arrangerer lokalt, fører gjerne til at fleire får delta, seier Tyssebotn.
Les også:
