Sprang snøgt til fjells i Ulvik
Tre blad Måge deltok i motbakkeløpet Kvasshovden opp i Ulvik 13. juli. Det eine vart nest best i klassen i NM.
Løpet hadde nemleg status som noregsmeisterskap dette året.
Best av kvemmingane gjorde Ove Måge det, syner resultatlista. Med tida 1.06.59 var han nest best i klassen for 50–54 år gamle menn, berre slegen av Lars Olaf Haaheim frå Varegg. Måge vart i tillegg nummer 48 av alle dei 100 mennene som var med i år, og slo mange løparar som er monaleg yngre enn han.
Også broren Lars og son hans, Sondre, deltok. Lars vart nummer 5 av 7 i den same klassen som Ove deltok i. Tida hans var 1.17.52. Med 1.12.47 vart Sondre nummer 4 i klassen for 20–22 år gamle menn.
To andre representerte Strandebarm Idrettslag og NTG Geilo: Sturla og Synne Oma Engevik. Sturla vart nummer 3 i klassen for 18– og 19-åringar med tida 1.08.43. Synne var best i klassen for 16- og 17-åringar med 1.21.21.
Frå Øystese Idrettslag deltok Arnstein Lofthus, som vart nummer 6 i klassen for 50–54 år gamle menn. Tida var 1.18.38.
Løpet går frå Ulvik sentrum til Kvasshovden, som ligg 1.030 meter over havet. Nær 170 deltok i konkurranseklassane. NM-vinnarar vart Håkon Skarsholt frå Andebu i herreklassen og Hanne Mjøen Maridal frå Strindheim. Tidene deira var høvesvis 46.56 og 57.14.
