Sprang seg varme i karusellen
Den åttande og siste runden i Vinterkarusellen i Strandebarm gjekk av stabelen i minusgrader og fullmåneskin tysdag kveld.
Litt kulde skremde ikkje dei litt over 40 unge og eldre deltakarane. Nokon sprang i shorts, andre i ull.
– Det er betre å sveitta enn å frysa, konstaterte Lars Måge, ein av fleire trufaste løparar, før start.
Johannes Skogseide Børsheim er formann i friidrettsgruppa i Strandebarm idrettslag, og har vore ansvarleg for løpa gjennom vinteren. Han seier at mellom 40 og 60 deltakarar har møtt opp i allslags vêr denne sesongen. Det er idrettslaget nøgd med.
Dei fleste av deltakarane er lokale, fortel Børsheim, men det er også tilreisande frå andre delar av Kvam, Kvinnherad og Bergen.
Fljott besøk
Ein av dei som brukar å ta turen frå Bergen, er Arthur Lillefosse. Han har vore med i over 20 år, og har ikkje gått glipp av eit einaste løp denne sesongen. Lillefosse kombinerer turen med å sjå til hytta, som ligg på staden med same namn – altså Lillefosse.
Bergensaren har vore aktiv heile livet. Det viste att på tida tysdag. 79-åringen sprang dei om lag fire kilometrane på 26.17.
– Eg skal ikkje klaga, seier han.
Lillefosse, som også spring løp på bykanten, synest arrangementet er eit flott tiltak.
– Mest moro
Like før start trefte HF to kameratar som var klare for løp. Filip Fernand Gravdal Eliassen og Even Tufta Flotve skulle begge vera med. At det var litt konkurranse mellom sjuåringane, var det ikkje tvil om, men dei sa at det var mest for moro dei var med.
– Det er ikkje om å gjera å koma fyrst, sa Eliassen.
– Men eg skulle få Playstation, sa pappen min, om eg slo rekorden min sist. Det gjorde eg, men eg fekk det ikkje.
Han verka ikkje å ta det veldig tungt.
Viste solidaritet
Etter at alle var komne i mål, vart det delt ut deltakarpremiar innomhus på Strandebarm skule. I Vinterkarusellen vert ein ikkje premiert etter tid, men deltaking. Dei som deltek på minst fem løp gjennom vinteren, får deltakarmedalje.
På bordet låg medaljane på rekkje og rad, og var festa til eit gult og blått band. Det er heilt bevisst, fortel arrangør Børsheim. Fargane symboliserer krigsvinteren, og er laga i solidaritet med ukrainarane.
Også ein del sponsorgåver vart delte ut til namn som vart trekte. Den gjævaste premien på bordet var eit gåvekort på 2.000 kr frå Mo Sport AS.
Dei tre raskaste kvinnene tysdag var Torild Kveberg (18.33), Irene Myrvold (21.45) og Irene Tangerås (21.48). Dei tre raskaste mennene var Emanuels Zaurins (15.12), Ove Måge (15.42) og John Olav Måge (16.19).
