Sprang langt og fort i Spania
I fjor deltok 4 kvemmingar i Valencia Marathon. Opplevinga var så god at i år hadde delegasjonen frå Kvam auka til 7.
Ein av dei var Hege Grane Hisdal, som sprang maraton for første gang. Ho hadde som mål å fulføra på under fire timar. Det klarte ho med god margin. Ho kom i mål med tida 3.44.37.
– Eg har aldri sprunge så langt som 42 kilometer før, og lurte på korleis det kom til å gå. Det gjekk over all forventing. Eg kjende med ein gong at kroppen var lett, og at eg verkeleg hadde dagen. For meg personleg vart løpet eit stort høgdepunkt, fortel ho.
Ho omtalar både løypa og temperaturen som behagelege.
– Det var ei ganske flat løype, og temperaturen var mellom 13 og 17 grader. Det er ein god temperatur å springa i, seier ho.
Fleire av dei andre deltakarane frå Kvam har allereie meldt seg på til neste år. Hisdal er usikker på om ho gjer det same.
– Me får sjå, seier ho.
Dei andre deltakarane frå Kvam var Eirik Kvarv, som sprang på 3.01.25, Børge Samson Klyve (2.58.08), Ingunn Erdal Klyve (4.33.49), Kristian Botnen (3.27.54), Håkon Hjartnes (3.34.12) og Gudmund Øvsthus (3.29.50).
Valencia Marathon gjekk av stabelen sundag 3. desember.
