Sprang, hoppa og kasta i solsteiken

Stemneleiar Knut Øystein Fosse samanfattar helga som svært vellukka.

– Me hadde vêret med oss. Det var varmt og vindstille og perfekte forhold for friidrett. Det var heller ikkje varmare enn at det gjekk fint. Skule me ha sprunge lenger enn 3.000 meter, kunne kanskje varmen ha vorte eit problem, seier han.

Færre deltakarar

Det var berre éin ting Fosse ikkje var nøgd med: talet på deltakarar. Til saman 117 utøvarar var i aksjon. Det var ein nedgang frå dei 140 som deltok i fjor, og langt færre enn stemnerekorden på om lag 300.

Fosse trur det at mange slutta med idrett under pandemien, er ei av årsakene. Ei anna er konkurranse frå andre arrangement.

– Denne helga var det både Voss Cup og Tyrvinglekene. Mange har truleg valt desse i staden for festivalen vår. Det er generelt mykje anna som skjer på denne tida av året. Det kan vera vanskeleg å finna «ledige» helgar, seier han.

Mange frivillige

Ifølgje Fosse var ikkje talet på frivillige mykje lågare enn talet på deltakarar.

– Tidlegare år har fleire enn hundre frivillige vore i aksjon. Eg trur ikkje talet er lågare i år. Friidrettsfestivalen er eit stort arrangement for ei lita bygd som Strandebarm. Den er det største årlege arrangementet til Strandebarm Idrettslag. Heldigvis er det relativt lett å få folk til å stilla på dugnad, seier han.

Nedgangen i talet på deltakarar kan få konsekvensar.

– Me skal evaluera heile konseptet. Mange klubbar på vår storleik arrangerer berre stemne som varer i ein dag. Sidan Strandebarm Idrettslag eig sportellet, ønskjer me at det skal verta brukt. Difor har me veldig lyst til å halda fram med å lata friidrettsfestivalen gå over to dagar, seier Fosse.

– Gode prestasjonar

Ifølgje Fosse inneheldt årets festival mange gode prestasjonar. Andrei Bringedal (Trio IL) presterte årsbeste i Noreg på 100 meter i klassen G13–14. Han sprang på 12,85 sekund.

Elise Andrea Bos (Lysekloster IL) fekk årsbeste i klassen J13–14 i tresteg med 10,95 meter.

Det vart òg sett fleire banerekordar. I seniorklassen for menn sette Anders Vik, som representerer Norna-Salhus, men har slekt i Strandebarm, ny banerekord i diskos med eit kast på 51,78 meter. Mariell Hetlesæter Morken (Voss IL) sette ny banerekord i kule i seniorklassen for kvinner med ein støyt på 13,21 meter.

Også på 3.000 meter for menn stod rekordar for fall. Sindre Solbakken Omvik (Rosendal IL) sette ny banerekord med tida 8.25,66.

I ein tidlegare versjon av artikkelen vart Knut Øystein Fosse etternamnet Fosso. Me ber om orsaking for slumse arbeid. Red.