Sprang for å støtta
20 friskusar trassa regnet og deltok i Strandadalsøpet laurdag.
Tradisjonen tru arrangerte Strandebarm Idrettslag mosjonsløp i Strandadalen. På startstreken stilte både born og vaksne, og dessutan ein liten firbeint krabat. Sistnemnde var debutant i det landlege arrangementet.
Vekslande vêr syrgde for at det vart nokre kraftige regnskurar både før og undervegs i løpet, men ikkje ein einaste av dei lokalavisa høyrde, klaga over det.
– Me bur trass alt på Vestlandet. Me kan ikkje halda oss inne kvar gong det er dårleg vêr, seier Ingunn Tangerås.
Ho tok turen til Strandadalen saman med Beate Ellingsen. Damene hadde ingen forventningar for løpet, og forklara at dei truleg ville veksla mellom å gå og jogga undervegs i den lengste løypa. Båe fortalde at den viktigaste årsaka til at dei deltok, var at dei ville stilla opp for det lokale idrettslaget.
Sjå biletserie frå løpet:
Nådde målet
Av dei totalt 20 deltakarane valde 7 å gå eller jogga den korte løypa på 2,9 kilometer. Dei som valde den lange løypa, gjekk, jogga eller sprang 5,7 kilometer. Heile løpet går føre seg på grusveg.
Fyrst over målstreken, i einsam majestet, var Sondre Flemmen Skogvoll, som sprang kort løype. Han klokka inn på tida 15.51. Nokre hundre meter bak han kom mamma Marita Flemmen Skogvoll, som sprang den same løypa.
Raskast av dei som sprang lang løype, var Sondre Svåsand Måge. Sluttida vart 19.39. Etter målgang fekk han stadfesta at målet for dagen var nådd – å fullføra løpet på under 20 minutt.
Den raskaste kvinna i lang løype var Lillian Ege Berentsen. Ho kom i mål på tida 24.55
Færre deltek
Arrangørane var noko usikre då dei vart spurde om når mosjonsløpet vart arrangert for fyrste gong. Eit raskt søk i arkivet til HF viser at nøyaktig dato er 2. september 1995. Den gong deltok litt over 30 unge og vaksne. Ifylgje det same arkivet var deltakartalet 67 året etter.
Johannes Skogseide Børsheim, leiar i friidrettsgruppa i Strandebarm Idrettslag, og Knut Øystein Fosse hadde ansvar for mellom anna registrering av løparar og tidtaking. Ifylgje dei har det vore ein nedgang i deltakartalet dei siste åra.
– Det er vanskeleg å seia noko om kva årsaka kan vera, men det skulle gjerne ha vore fleire, seier Fosse.
