Sprang betre enn nokon gong
Kring 30.000 personar – mellom andre fire kvemmingar – stod spente ved startstreken då Valencia Marathon gjekk av stabelen i Spania sundag.
– Det var artig. Men det var langt. Det visste eg jo. Men eg synest det gjekk veldig bra.
Det seier Børge Samson Klyve. Han sprang sin fyrste maraton nokosinne. Då han passerte målstreken, hadde han nådd målet om springa 42 kilometer på under tre timar. Tida vart 2.58.32.
Dei andre som var med frå Kvam – Eirik Kvarv, Terje Bekkesletten og Magnus Hisdal –, hadde skremt han litt på førehand. Klyve prøvde difor å springa litt kontrollert for ikkje å møta veggen. Det gjekk ganske bra, synest han sjølv. Han trur attpåtil at han kjem til å gjera noko liknande igjen.
Optimale forhold
Også resten av gjengen sprang på under tre timar og enda med nye personlege rekordar. Eirik Kvarv sprang på 2.48.46, Magnus Hisdal på 2.59.18 og Terje Bekkesletten på 2.45.21.
– Forholda var topp, fortel Hisdal.
Delvis kan reiseleiar Kvarv takkast for det. Mellom anna låg leilegheita som var leigd til turen, like ved startstreken. Såleis kunne karane berre gå ut og stilla seg opp då løpet starta sundag morgon. Samstundes var løypa flat, vêret fint og temperaturen perfekt med mellom 12 og 15 grader, fortel Hisdal.
– I lengste laget
Hisdal, Kvarv og Bekkesletten reiste utanlands for å springa maraton også i fjor haust. Den gongen var det i Amsterdam.
Årets tur har vore planlagd sidan i vår.
– Har de fleire maratonreiser framfor dykk?
– Me veit ikkje kva som vert det neste, men det er nok fare for at det skjer att. For min del er det i lengste laget, men dei andre kjem heilt sikkert til å fortsetja, seier Hisdal.
