Sportsleg moro i Strandebarm

Trass skiftande vêr og til tider kraftige regnbyer var det yrande liv ved idrettsanlegget i Strandebarm. Unge gutar og jenter kledde i raude, blå eller kvite drakter kjempa tappert på dei ulike banene. Laga som kjempa mot kvarandre i forskjellige aldersklassar, var frå Ålvik, Øystese, Norheimsund, Tørvikbygd og Strandebarm.

Eitt av laga til vertsklubben, Strandebarm G9, spela sin andre kamp for dagen då HF tok turen innom arrangementet. Dei var ved godt mot før start, etter å ha vunne kamp nummer ein. Også motstandarlaget, Norheimsund G9 svart, var optimistisk etter å starta dagen med å spela uavgjort.

Lokaloppgjeret starta jamt. Etter fyrste omgang var stillinga 2–2. Heller ikkje i andre omgang var det mangel på målsjansar. Nokre skot gjekk i tverrliggjaren, og andre vart redda av målvaktene. Båe lag kjempa tappert frå avspark til dommaren bles av kampen. Det var heimelaget som til slutt trekte det lengste strået og vann 5–2.

Moro og sosialt

Det var ein gjeng glade gutar som slo av ein prat med lokalavisa etter kampen. Trym Svåsand (10), Lars Lutro Gjerde (9), Jonas Vestbø (7) og Torjan Berge (8) var alle godt nøgde.

– Det var veldig gøy!

– Ja, me spela bra.

– Eg fekk vondt i hovudet. Eg skalla i stonga då eg skulle heada ballen. Men det gjekk bra.

Gutane fortel at dei har spela éin cup på heimebane tidlegare. Det var i vår.

– Kvifor er de med på cup?

– Fordi då har me det gøy.

– Og så får me vera med vener.

Ifylgje strandbermingane gjorde det ikkje så mykje at vêret var varierande, men dei kunne melda om eit noko sleipt underlag. Likevel hadde det vore få fall, understreka dei.

Kort tid etter sigeren var det berre å hiva seg rundt igjen. Då venta dagens tredje og siste kamp.

– Korleis trur de kampen vil gå?

– Eg trur me vinn den òg! seier ein av dei sjølvsikkert.

Von om tradisjon

Far til Jonas, Vegard Vestbø, er ein av initiativtakarane til arrangementet. Ifylgje han er det fleire år sidan det sist vart arrangert fotballcup i Strandebarm, sett bort frå ei miniturnering i mai.

– Det er veldig kjekt å ha ein eigen cup her, seier han.

Med seg på laget har han mellom andre Øystein Hoff. Dei to karane fortel at dei vart inspirerte til å få til noko eige etter å ha vore på cup i Ålvik med borna.

– Me syntest det verka som ein god idé. Noko sånt måtte me få til, seier Hoff.

Ifylgje Vestbø og Hoff har det ikkje vore vanskeleg å få tak i nok frivillige. Både foreldre og ungdomar har stilt opp for idrettslaget. Det er dei veldig takksame for, seier dei.

– Har alt gått etter planen?

– Ja, utanom vêret har det det. No vonar me at det kan verta ein tradisjon igjen, seier Vestbø.