Sponsar skiskyttartalentet

Fredag fekk skiskyttartalentet Hanna Børve overrekt ein splitter ny, sponsa Ford Puma. Øystese Mek Verksted AS (ØMV) sikrar ein gunstig leasingavtale over tre år, medan andre lokale sponsorar er med på å dekka månadsbeløpet.

Børve synest det er veldig stas å ta imot den nye bilen.

– Eg har lenge tenkt at eg har lyst å få sponsa ein bil. Eg tok kontakt, me diskuterte litt, og me kom fram til ein fin avtale. Bilen er sprek og stilig og god til vinterbruk. Det er viktig, det vert jo mykje vinterkøyring, seier Børve.

Meir sjølvstendig

Sponsing frå lokale verksemder gjer at Børve kan driva med det ho gjer og satsa for fullt på det sportslege. Ho har ikkje mykje tid til å jobba ved sida av proffsatsinga, og sjølv om landslaget dekker mange utgifter, får ho ikkje noko formell inntekt frå landslaget.

– Alle sponsorane på laget er del av satsinga mi. Eg er nesten avhengig av dei, og eg er veldig glad for at eg har dei med. Det er ikkje ei sjølvfølge i det heile, seier ho.

Gjennom åra har Børve hatt foreldre som har vore flinke til å støtta og legga til rette for at ho kunne driva med idretten. No ønsker ho å verta meir økonomisk sjølvstendig.

– Eg trur foreldra mine òg set pris på dei lokale sponsorane, seier ho.

Kvam i ryggen

I tillegg til ØMV er Børve støtta av Kleppe Møbelfabrikk AS, Tecno VVS AS, Lingalaks AS, Mo Sport AS, GBS Entreprenør AS, Hardanger Revisjon AS, og Jan Mo AS. Dessutan har bror hennar sponsa skiboksen.

Børve seier at ho ser på sponsinga som eit samarbeid. I tillegg til å ha klistremerke på den nye bilen, profilerer ho sponsorane i sosiale medium og der ho elles har høve.

– Eg set veldig pris på dei og håpar at eg kan gi litt tilbake, seier ho.

Alle sponsorane er heimehøyrande i Kvam. Børve synest det er stas å ha lokalt næringsliv i ryggen når ho konkurrerer på eit høgare nivå.

– Eg er stolt av å vera frå bygda, og kjenner ei tilhøyrsle her sjølv om eg har flytta bort. No set eg endå større pris på heimstaden min. Då er det kjekt at folk herfrå er med på laget og støttar meg, seier ho.

Ønsker å bidra

Salssjef Christoffer Gjerde i ØMV er begeistra for å få sponsa eit lokalt talent. Han seier at verksemda var positiv då Børve tok kontakt.

– Me bidreg til å få ned kostnadene hennar, så ho slepp å ha ein ekstrajobb som går ut over trenings- og skuletid, som bør vera førsteprioritet for henne. Viss ein skal satsa på nasjonalt nivå, går det med eit monaleg tal med treningstimar, reknar eg med – sjølv om eg ikkje har vore borti det sjølv, seier Gjerde.

ØMV sponsar dessutan ei rekke lokale lag, mellom anna Øystese Fotball, Hardanger Golfklubb, Rossvoll Volleyballklubb, Kvam Langrenn- og Skiskyttarklubb og rulleskøytebanen i Vikøy. Dessutan gir ein til dømes premiar til basarar.

– Me bruker mykje pengar på å sponsa lokalt. Me får reklameplakatar, men ventar ikkje å få så mykje att. Forretningsmessig sit me ikkje att med så mykje, det handlar meir om å vera ein bidragsytar, seier Gjerde.

Økonomisk sirkel

Til gjengjeld meiner han at lokalbefolkinga bør gi tilbake ved å handla lokalt. Nettbutikkane tilfører ikkje lokale idrettslag eller organisasjonar noko, påpeiker han.

– Eg vil tru det er ekstremt viktig for idrettslaga at dei vert sponsa av næringslivet i kommunen. For at særleg barneidretten kan drivast, må det lokale næringslivet trå til og bidra til økonomien til dei ulike laga. Det er essensielt for å få det til å gå rundt, seier han.

Samstundes bidreg det positivt til renomméet til verksemda å støtta lokale lag og organisasjonar, slår Gjerde fast.

– Det vert bygd opp på ein positiv måte når me bidreg til fellesskapet. Eg trur me hadde fått høyra det om me ikkje hadde vorte med, seier han.