Sparka og slo til seg medaljar
Utøvarar frå Kvam sikra den lokale karateklubben fleire edle medaljar då dei deltok i cup i Fyllingsdalen i helga.
Laurdag arrangerte Lyderhorn karateklubb JKA Cup i Fyllingsdalen idrettshall. Tre gull- og fire bronsemedaljar, i tillegg til fleire deltakarmedaljar, vart resultatet til deltakarane frå Kvam Karateklubb.
I dei ulike klassane kunne Johannes Lodden reisa heim med to eksemplar av den edlaste medaljesorten. Mathias Vik sikra seg eitt gull og ein bronse, medan Eirik Lunestad, Vetle Neteland og Hannes Skaar fekk kvar sine bronsemedaljar.
Det var rekordstor påmelding til cupen i helga, og karateklubben i Kvam stilte med 18 utøvarar, fortel hovudtrenar Helge Fonneland Bu. Han var godt nøgd med at så mange av medlemane deltok.
— Det var kjekt å få visa motstandarklubbane at me kunne stilla mannsterke til kamp, seier han.
Ifylgje Bu nytta nokre av utøvarane cupen som førebuing til gradering til svart belte, der dei fekk gått i frikamp og trena på å presentera for andre. Fleire av deltakarane er også godt i gang med førebuingar til noregsmeisterskapen, som går av stabelen i mars.
— Me tykkjer det er veldig kjekt å vera i gang med konkurransar att og vonar at mange stiller opp i NM òg, seier trenaren.
