Sp vil støtta bordtennissatsing

Det går fram av eit spørsmål frå gruppeleiar Jostein Ljones til heradsstyret 8. desember.

Pengane vil mellom anna gå til leige av hallen ved den tidlegare yrkesskulen i Steinsdalen, skriv klubben på heimesida. Prosjektet bidreg til integrering og aktivitet for ungdomen, noko partiet ser svært positivt på, skriv Ljones.

Kom ikkje i budsjettet heller

Klubben skriv til heradet at Hardanger Bordtennisklubb (HB) opplever stor tilgang på ungdomar som vil vera aktive i klubben. Klubben har òg mange medlemer frå ulike nasjonar og med ulike utfordringar.

Sportsleg leiar Håvard Markhus minte heradet om at klubben allereie i vår sende ein søknad om stønad. Svaret frå rådmannen var at søknaden måtte handsamast som del av budsjettet. Då Markhus såg at prosjektet ikkje låg i budsjettforslaget til rådmannen, tok klubben kontakt med administrasjonen og fekk melding om at prosjektet skulle handsamast administrativt etter budsjettvedtaket.

Leiar for samfunn, næring og kultur i heradet, Jon Nedkvitne, skriv i eit brev til klubben 17. november at rådmannen i budsjettforslaget ikkje har føreslege stønad til bordtennisklubben. Søknaden er heller ikkje lagd inn på lista over ynske, der politikarane har fått ei oversikt over innspel til budsjettet. Rådmannen vil heller vurdera om det er rom for stønad innanfor dei ordinære rammene i 2023. Eventuell stønad må difor vurderast etter at heradsstyret har gjort sitt budsjettvedtak 8. desember, skriv Nedkvitne.

– Tek ikkje med alt

I eit straumbrev til HF opplyser Nedkvitne at administrasjonen ikkje legg fram ei uttømmande liste med alle ynske som er fremja. Søknader som fell inn under eksisterande ordningar, vert som hovudregel viste til desse ordningane, og ikkje som enkeltsaker i budsjettet. I budsjettsamanheng kjem det eventuelt framlegg om rammeauke, ikkje om enkeltståande løyvingar.

– I dette høvet har me vurdert det som at søknaden fell innunder eksisterande ordningar, og vidare har me ikkje fremja generell auke i tilskotsordninga ut frå den totale økonomiske situasjonen til kommunen, skriv Nedkvitne.

Klubben står fritt til å ta opp saka direkte med politikarar på eige initiativ, skriv Nedkvitne. Mykje tyder på at så er gjort; Sp ynskjer å vita status i saka i møtet 8. desember.