Sommarleir i full drift

Leiren varar til og med laurdag. 67 deltakarar i alderen 12–18 år er påmelde. Leirsjef Eilev Nyland fortel at det er stor variasjon i kor deltakarane kjem frå. Mange er lokale. Resten kjem frå blant anna Hol, Vikersund, Sandnes, Bergen og Fram i Trøndelag. Nyland er nøgd med deltakinga.

– Eg trur mange av spelarane set pris på å koma i gang med volleyball innandørs. Her får dei trena åtte gongar på fire dagar. Det gjev dei eit godt forsprang før sesongen byrjar, seier Nyland.

Trenarane på sommarleiren er blant dei beste klubben kunne hatt, fortel Nyland. Jakub Tecza, Martin Mjelde Bjelland og Maria Farsund er alle trenarar for elitelag for kvinner. Torbjørn Milde frå Strandvik og Jon Erlend Haukås frå Rossvoll utgjer resten av trenarkabalen.

– Alle er særs kompetente og kan syna til erfaring med å trena ungdomar og vaksne på høgt nivå, seier Nyland.

Grunnleggjande ferdigheiter

Oline Myklebust (12) er blant deltakarane på sommarleiren. Til dagleg spelar ho volleyball for klubben Gneist i Bergen. Ho overnattar på Kvam vidaregåande skule saman med mange av deltakarane. Dette er fyrste gong ho deltek på sommarleiren.

– Det er kjekt på leir. Eg har forbetra meg sjølv og fått nyttige tips om teknikk. Trenarane er flinke til å forklara. Det er spanande å få tilbakemeldingar frå trenarar som ikkje kjenner meg frå før, seier Myklebust.

Det er to treningsøkter dagleg. Fokuset er å forbetra grunnleggjande ferdigheiter, fortel Nyland. Trenarane gjev tydelege instruksar og tilbakemeldingar til spelarane. Nyland påpeikar at terping av teknikk er nyttig i starten av ein ny sesong. Spelarane kan opparbeida seg gode vanar, som dei tek med seg inn i sesongen, fortel leirsjefen.

– Viktig med god oppleving

På kveldstid er det sosiale aktivitetar for deltakarane. Laurdag skal leiren avsluttast med ei turnering. Det skal òg delast ut ein premie til ein av spelarane. Trenarane har fått tak i ei drakt frå sandvolleyballspelaren Anders Mol, som rauk ut av OL i Paris torsdag kveld.

– Det er ikkje nødvendigvis den beste spelaren som får drakta. Drakta går til den som går framføre som eit godt eksempel og bidreg til at andre yter godt, påpeikar Nyland.

Leirsjefen tykkjer leiren har eit godt program i år. Han vonar at sommarleiren kan fremja godt samarbeid mellom klubbane. Det viktigaste er at spelarane trivst.

– Det er viktig at deltakarane sit at med ei god oppleving frå opphaldet, påpeikar Nyland.