Sollesnes best av hardingane
Liv Sollesnes frå Jondal presterte 245 poeng på Landsskyttarstemnet tysdag ettermiddag.
Dei beste skyttarane i klasse 5 har heile ettermiddagen skote på arenaen i Steinkjer.
Sollesnes, som har vorte skyttarprinsesse 4 gonger før, mista 2 poeng på serien i ståande stilling. Eit nytt poengtap i kneserien gav henne 147 poeng etter dei tre 5-skotsseriane, før eit såkalla grunnlag på 98 sikra henne 245 poeng totalt. Det held truleg ikkje til plass i kongelaget – finalelaget for dei aller beste – onsdag kveld.
Bror til Liv, Bjarne, hadde fullt hus etter serien i ståande stilling og fekk difor eit NRK-kamera retta mot seg, men mista sidan 9 poeng og enda på 241 poeng.
Harald Brekke frå Hardanger Skyttarlag låg godt an etter 148 poeng på dei fyrste 15 skota, men mista 6 poeng på det såkalla grunnlaget og enda med 242 poeng. Det er langt frå nok til å få plass i kongelaget. Den same summen har jondøling Bjørnar Wikane. Trine Flotve vart best av Hardanger-skyttarane med sine 243 poeng.
