Snø skapar optimisme

Stein Olav Ness, medlem i skistyret i Jondal Idrettslag, trur årets sesong vert både god og lang.

– I år er snøsituasjonen heilt spesiell. Det må skje noko uvanleg om ikkje me skal ha snø i lysløypa ut april, seier han.

Ness fortel at interessa for klubbrenna har vore stabil dei siste åra.

– Det pleier å variera mellom 20 og 40 deltakarar på renna. Dei fleste er born. Me, som dei fleste andre, slit med fråfall. Dei fleste sluttar når dei kjem tidleg i tenåra, fortel han.

Han har lagt merke til ei endring dei siste åra.

– Eg ser at fleire foreldre med aktive born sjølve hentar fram skia og byrjar gå renn. Det er positivt. Eg håpar at fleire hiv seg på trenden, seier han.

Idrettslaget arrangerer lysløyperenn på Storemyr om fredagane i januar og februar. Det første vert skipa til 19. januar. Renna vekslar mellom fristil og klassisk. 25. februar inviterer laget til lagsmeisterskap. I år står klassisk stil for tur. 10. mars går Olastølsrennet av stabelen. Klubben har sett av onsdagane til trening.

Følgjer tradisjonen

Også i Kvam skapar snøen optimisme.

– Løypene på Sjusete er flotte. Unngår me lange periodar med mildvêr, håpar eg me slepp å avlysa noko, seier leiar Håkon Arne Laupsa i Kvam Langrenn- og Skiskyttarklubb.

Klubben byrjar arrangera serierenn i januar. Annakvar veke vert det langrenn og annakvar veke skiskyting. I tillegg inviterer klubben til to tradisjonsrike renn: Torefjellsrennet 9. mars og Kvammasprinten 10. mars. Det vert elles krinsrenn i skiskyting 2. og 3. mars.

Tysdagane og torsdagane er sette av til trening. Tysdagane øver ein på klassisk stil og torsdagane på fristil. For dei yngste borna vert det skileik før torsdagstreningane. I år er skileiken for born fødde i 2016, 2017 og 2018.

Laupsa har ikkje konkrete tal å slå i bordet med, men magekjensla seier at talet på aktive i klubben har vore stabilt dei siste åra.

– Det er alltid stor aktivitet på skileiken, men så fell mange frå etter kvart som dei vert eldre. Slik er det i alle idrettar. Kvam LSK held likevel fram med å fostra skiløparar og skiskyttarar på eit høgt nivå, seier han.

– Nye lys

Lars-Hogne Berge er styreleiar i Sjusete skisenter. Han fortel at dei siste 84 gamle lyspærene vart bytte ut med LED-lys i oktober. Straumrekninga vert dermed mindre, samstundes som lyskvaliteten vert betre.

Lysa i lysløypa er kopla til eit astronomisk ur. Dei slår seg på når det vert mørkt, og slår seg av klokka 22.

– Teknologien gjer at lysa i praksis ikkje slår seg av før klokka 22.10. Dei som har overvurdert eiga form, har dermed ti ekstra minutt til å koma seg gjennom løypene, seier han.

– Leik og moro

Strandebarm Idrettslag kan velja mellom turløypa på Haukås og lysløypa på Åse når laget skal arrangera skiaktivitetar. Torunn Lutro er leiar i skigruppa. Ho fortel at laget har planar om å gjennomføra både skisprell og hovudlykttur for dei minste. Det vert truleg ein tur rundt Sneldevatnet på Haukås. Kanskje vert det også eit serierenn eller to og kanskje ein klubbmeisterskap. Datoane er førebels ikkje klare.

– Me plar hiva oss rundt og arrangera noko når vêret tillèt det. Sidan det ser ut til å verta mykje snø, vil me prøva å få til noko rett over nyttår, fortel ho.

Det plar vera mellom 20 og 25 deltakarar når klubben inviterer til aktivitetar. Dei aller fleste er born og unge.

– Me har mange aktivitetar utan startnummer. Eg trur det appellerer til mange. Det handlar om å koma seg ut og ha det kjekt, snarare enn å gå så fort som mogleg, seier ho.

Vêrmeldingane tilseier kaldt, stabilt vêr med ein god del sol den komande veka.