Små og store sprang for anlegget
Strandebarm Idrettslag har vorte inspirert av Framnes Kristne Vidaregåande skule. Laurdag arrangerte idrettslaget for første gong eige sponsorløp.
Konseptet er enkelt. Medlemmer av idrettslaget og andre interesserte vart oppmoda om å skaffa seg sponsorar som var villige til å betala for at dei spring rundar i idrettsparken.
Sponsorane bestemmer om det er nok at deltakarane berre deltek, eller om det skal betalast for kvar runde deltakaren spring. Sponsorane bestemmer sjølv kva summar dei vil betala.
Alt sponsorane betalar, går til vedlikehaldsfondet idrettslaget har oppretta for finansiera vedlikehald av idrettsparken.
– Vedlikehald er viktig
Sigrun Helen Tufta, Tonje Helen Gravdal og Torunn Lutro var tre av dei mange som tok på seg treningsklede og startnummer og sprang for å støtta laget. Alle tre er aktive i laget. Tufta er primus motor i aerobics-gruppa, Gravdal er leiar i volleyballgruppa, medan Lutro er leiar i skigruppa.
Damene hadde overtala sine nærmaste til å vera sponsorar.
– Eg vert eg sponsa av mannen min og meg sjølv, fortel Tufta.
Alle tre er samde om at sponsorløp er ein fin måte å skaffa inntekter til fondet på.
– Det kostar lite å arrangera, slik at det er lett å det lett å få eit overskot, seier Gravdal.
– Me er stolte over idrettsanlegget vårt og glade for at me har det. Då er det viktig å halda det ved like, seier Lutro.
Både Tufta og Lutro fekk inntekter alt etter kor mange rundar dei spring.
– Så for oss er det vel berre å henga i, seier Lutro.
Gravdal fekk berre ein eingongssum uavhengig av rundetal.
– Men om dei to andre skal springa mange rundar, vil ikkje eg vera dårlegare, seier ho.
– Målet er ti millionar
Olav Sletvold er kasserar i Strandebarm Idrettslag og medlem av styret som har ansvaret for å forvalta fondet. Han fortel at målet er å skaffa ein grunnkapital på ti millionar kroner og bruka avkastinga til å finansiera vedlikehaldsarbeidet. Det er eit stykke att før ein er i mål. Før løpet hadde fondet eit innskot på i underkant av éin million kroner.
Fleire enn 120 deltakarar sprang éin eller fleire rundar. Alderen på deltakarane varierte frå 8 til over 70 år. Dei aller ivrigaste passerte femti rundar, medan andre var nøgde med å berre springa éin. Til saman klarte deltakarane å springa inn om lag 150.000 kroner.
– Det tykkjer eg me skal vera nøgde med. Eg hadde ikkje rekna med så store summar. Eg hadde vore nøgd om me bikka 100.000 kroner, seier Sletvold.
Planen er å arrangera årlege sponsorløp dei neste åra.
– Me treng ein del inntekter dersom me skal nå målet vårt på ti millionar kroner. Sponsorløpet vil vera ei av inntektskjeldene til fondet, seier Sletvold.
Då alle hadde sprunge frå seg, vart dagen avslutta med trekking av det Sletvold omtala som åtte til ti gjæve premiar. Vinnarane vart trekte frå startnummera.
