Slo frå seg i Førde
To lag frå Framnes Kristne Vidaregåande Skule deltok i volleyball-NM for vidaregåande skular i helga. Eitt reiste heim med medalje.
Gutane rauk ut i kvartfinalen og enda til slutt på 6.-plass. Jentene spela seg heile vegen til finalen, der det vart tap mot NTG Tromsø.
Volleyballtrenar Thomas Evensen var ikkje trist av den grunn.
– Dette var fantastisk. Framnes har delteke i denne turneringa i mange år. Eg kjenner ikkje til at noko lag frå Framnes har fått ei betre plassering. Me er ikkje ein skule som først og fremst er kjend for volleyball. Eg trur mange hevar augnebryna når dei får høyra at eit Framnes-lag reiste frå turneringa med sølvmedaljar, seier han.
Dramatiske kampar
For å koma til landsfinalen i meisterskapen for vidaregåande skular 2023, som turneringa eigentleg heiter, måtte laga fyrst gjennom ein kvalifiseringsrunde som vart spela i november. Kvalifiseringa silte ut dei dårlegaste laga, og ifølgje Evensen var nivået på laga i Førde høgt.
Framnes-jentene hadde ingen lett veg til finalen. I semifinalen møtte dei heimelaget Førde.
– Førde var store favorittar sidan dei spela på heimebane og hadde publikum i ryggen. Det vart 1–1 i dei 2 første setta, før kampen vart avgjord i eit finalesett som berre gjekk til 15 poeng. Me starta veldig dårleg og låg lenge under, men så plutseleg fann jentene flyten og vann 15–13, fortel Evensen.
I finalen møtte Framnes-jentene overmakta.
– Heile laget til NTG Tromsø er landslagsspelarar. Dei var rett og slett for gode for oss, fortel Evensen.
Måtte spela mot kjende
Julianne Haughom er ein av spelarane på Framnes-jentene. Ho har spela på landslaget, og i finalen møtte ho spelarar ho har spela saman med tidlegare.
– Det var veldig gøy å treffa så mange eg kjenner. Det var litt rart å plutseleg stå på den andre sida av nettet, seier ho.
Haughom fortel om ei koseleg helg. Elevane budde på Sunnfjord folkehøgskule og hadde det kjekt saman.
– Det var litt drit å tapa finalen, men me møtte eit lag som spelar på toppnivå i Noreg og trenar fleire gonger om dagen, seier ho.
Ho er veldig nøgd med innsatsen til Framnes-jentene.
– Eg hadde aldri sett for meg at me kunne koma så langt, seier ho.
Vanskeleg opplading
Evensen fortel at han er overraska over at det gjekk bra som det gjekk.
– Laga fekk ein del skadar dei siste vekene før turneringa. Dessutan var me plaga med omgangssjuke. Me var ganske reduserte då me kom til Førde. Heldigvis var spelarane sjuke og sengeliggjande på kvar sine dagar. Dimed gjekk det betre enn eg hadde frykta, seier han.
Dei gode resultata i landsfinalen gjer at klubben får betre seeding til neste skuleår.
– Det gjer at laga våre får ein lettare veg til finalen. Me gler oss. Kanskje kan me gjera det endå betre til neste år, seier Evensen.
Turneringa gjekk av stabelen frå fredag 27. januar til sundag 29. januar. Førde Volleyballklubb var arrangør i år. 54 lag frå heile landet spela til saman 174 kampar. Alle kampane vart spela i Førdehuset.
