Slår eit slag for minigolf
Etter mange timar med dugnadsarbeid er minigolfbana i Strandebarm klar for bruk. Tre lokale ungdommar har testa det nye anlegget.
Amalie Eide Aase og Ida Djupevåg har spela minigolf før, men ikkje i Strandebarm. For Ingrid Almås Eide er dette fyrste gongen ho prøver aktiviteten. Ho tykkjer det er stas at idrettslaget har fått til eit slikt tilbod i heimbygda.
– Det er veldig flotte fasilitetar i Strandebarm no, med både båthamn, kafé og minigolf. Det har skjedd mykje dei siste åra, seier Eide.
Aase fortel at det var lokale gjester som spela før dei kom. Ifølgje Eide har det vore ein del folk og spela etter at anlegget opna i sommar – både lokale og turistar. Ein kan leiga golfball, køller og poengark i kafeen ved båthamna.
Då HF var innom og snakka med jentene måndag, var det Djupevåg som låg best an i spelet så langt.
– Eg har berre flaks, seier ho.
Eide tykkjer det er kjekt å spela saman med vener, og synest minigolf er ein passande kveldssyssel. Djupevåg er sikker på at jentene kjem til å spela fleire gongar.
