Skulle gjerne hatt fleire med på Torefjellsrennet
Kort sagt: Nydeleg føre og vêr, men få deltakarar i Torefjellsrennet laurdag.
Laurdag var det for fyrste gong på 2 år duka for Torefjellsrennet på Sjusete. I strålande sol konkurrerte 38 deltakarar. I tillegg kunne dei som ynskte det, gå ei valfri lengd mellom 5 og 13 kilometer i trim- og familierennet.
For deltakarar under 18 var turen anten 5 kilometer for dei i gruppa 11–12 år eller 11 kilometer for dei i gruppa 13–16 år. Alle over 17 som konkurrerte i tevlinga Hardhausen, måtte halda ut i heile 40 kilometer. Mellom anna gjekk dei den relativt nye og kuperte løypa som passerer Nystøl og Fagrasete.
Nøgd vinnar
Jonas Hauger (18) frå Kvam Langrenn- og Skiskyttarklubb vart nest fyrst over målstreken etter å ha gått i klassisk stil i 2 timar, 16 minutt og 3 sekund.
Han er nøgd med resultatet og synest den nye løypa var både utfordrande og kjekk. Han har heller ikkje noko å utsetja på føret og vêret, men håpa at det skulle vera fleire deltakarar.
Søskena Synne, Isak og Vegard Duesund Børve deltok i familierennet. Dei er nøgde med eigen innsats.
— Me gjekk 7 kilometer, seier Vegard medan han viser fram medaljen han fekk.
Få deltakarar
Sverre Lindøy frå Kvam LSK var ansvarleg for å annonsera hendingane over høgtalaranlegget. Han meiner at alt det tekniske gjekk som smurt, men at oppmøtet kunne vore betre.
I år møtte 20 opp til Hardhausen, noko som er færre enn andre år. I tillegg var berre 4 lokale frå arrangørklubben med.
Lindøy peikar på koronaen som ein mogleg grunn til dei låge deltakartala.
— Ting har vore avlyste dei siste par vintrane i skisporten, og når det er lite som har skjedd, har kanskje ein del falle av lasset, uttalar Lindøy.
Han understrekar likevel at det er kjekt å få starta opp arrangement no når samfunnet er ope igjen.
Alle resultat er tilgjengelege på heimesida til Sjusete skisenter og arrangørklubben.
