Skjermar samla ungdomen: — Nokre seier det er tull, men det stemmer ikkje

Fleire ungdomar og nokre føresette hadde teke turen innom lokalet i Nedre Vik då den nyetablerte klubben stelte i stand open dag. Ein gjeng som sat i sofaen, hamra laus på dei trådlause kontrollane. Andre hadde fått på seg hovudtelefonar og var godt plasserte i spelestolane framfor dataskjermane. Felles for alle er interessa for dei elektroniske spela.

12-åringane Alexander Nitter, Eirin Laupsa og Nathalie Lyssand nytta den grå og regntunge laurdagen til å spela sjølve og å sjå på at andre spela. Medan jentene hadde sin fyrste tur innom, har Nitter vore medlem frå dag éin.

For den speleglade guten er det ikkje vanskeleg å seia noko positivt om e-sport. Han opplever at han får moglegheit til å utforska og å vera kreativ. I tillegg tykkjer han at han får utvikla engelskferdigheitene.

— Men er det så bra med all denne spelinga?

— Nokre seier at det er tull, men det stemmer ikkje. Ikkje berre er det lærerikt, men også veldig sosialt. Me samarbeider og snakkar saman heile tida! seier Nitter.

Både han og jentene spelar ein del på fritida. Det sosiale nemner også Laupsa og Lyssand.

— Det er veldig kjekt å spela med vener. I tillegg kan ein få nye vener når ein spelar, seier dei to jentene.

Båe er interesserte i den nye e-sportsklubben og fortel at dei tenkjer å melda seg inn.

Linn Grete Tellevik tykkjer det er bra at nokre jenter har våga seg innom. Ho og Siriann Lillevik er dei einaste damene i gjengen til no. Tellevik meiner det er viktig at klubben ikkje berre er for gutar. Ho fortel at styret ynskjer å leggja til rette for at fleire jenter skal våga seg frampå. Ifylgje henne har e-sportsgjengen lagt ein plan.

— Me vil stella i stand treningar som berre er for jenter. Tanken er at jentene kan samlast, vera sosiale og spela saman. Målet er at dei skal oppleva meistring og kjenna seg trygge — at dei ikkje skal vera redde for å innrømma at dei likar å spela data- og tv-spel, seier Tellevik.

— Prøva seg fram

Klubben opna dørene i månadsskiftet januar—februar. Leiar Daniel Olsen fortel at dei fyrste vekene har gått med til prøva seg fram og finna ut korleis alt fungerer. Mykje er nytt for både styret og medlemane, så ein treng tida til å gjera seg kjend med alt, påpeikar han.

Ifylgje styreleiaren har oppstarten gått bra. Den største utfordringa er å finna ut korleis treningsøktene skal leggjast opp for at medlemane skal få mest mogleg speletid — for skal ein verta god, lyt ein få tid framfor skjermen.

Kvar av spelarane har så langt fått kring éin time per økt. Klubben har til saman seks datamaskiner som skal fordelast likt mellom dei.

Dei speleglade medlemane kan velja mellom fire ulike spel til trening. Ifylgje Olsen har styret plukka ut spel som dei sjølve har god kjennskap til. I tillegg er det spel som er store nasjonalt og internasjonalt i e-sport-verda, legg han til.

Fortnite fengjer flest mest, fortel Olsen. Den store interessa har ført til at klubben har stelt i stand ekstraøkter i det populære spelet.

— Korleis har tilbakemeldinga vore?

— Dei som har sagt noko, seier at dei har hatt det kjempekjekt. Fleire av dei som har kome for å prøva sporten, har vorte medlemar etterpå. Dei har uttrykt at dei tykkjer det er bra at det har kome eit slikt tilbod til Kvam, seier Olsen.

Samarbeid og analysar

Dei positive tilbakemeldingane er viktige og gjev styret motivasjon til å satsa vidare, seier Olsen. Klubben har eit mål om å ta ut eit eige lag, slik at kvemmingane kan delta i konkurransar.

E-sportsklubben i Kvam er medlem i Vestland E-sport, som har ein avtale med Esport Danmark. I samband med dette får gjengen i Kvam opplæring og kursing av danske instruktørar, forklarar Olsen.

— Me lærer korleis me kan analysera spela og gje konstruktive tilbakemeldingar, slik at ein utviklar seg og vert betre, seier styreleiaren.

Og skal medlemane verta skikkeleg gode, er det ikkje berre trening framfor skjermen som gjeld. Det er også planar om fysiske treningar. Ifylgje Olsen prøver klubben å få til ein avtale med Kvam ungdomsskule om lån av ein gymsal.

— Gode spelarar må trena på ulike måtar. I gymsalen vil me leggja opp til aktivitetar som krev samarbeid og øvingar som styrkjer laget, seier han.