Skisprell i snøen

Både små og store labba rundt i snøen på beina eller på ski.

– Målet er å skapa skiglede og så nokre små langrennsfrø hjå dei minste. Dei skal ha det kjekt og ha lyst ut på ski når det kjem snø, seier Torunn Lutro, leiar av skigruppa.

Allereie klokka 11 laurdag morgon var det fyr i bålpanna. Halvor, Solveig og Sigmund Djupesland Tveitnes tok lunsjen utandørs. Dei bur på garden, og hadde fått mange på besøk i bakkane bak huset. Pølse, pølsebrød og ketsjup stod på menyen.

– Eg har drukke kakao til frukost. Mamma er inne og lagar meir, seier Halvor.

Sigmund fortel at han var den fyrste som testa skiløypa.

– Eg var ute og gjekk på ski rett etter løypa var trakka, seier han.

– Det er ikkje så lett

To dagar trong Lutro, Sara Stave og resten av skigruppa til å planleggja skisprell på Oma-Åse. Lutro fortel at Skiforbundet oppfordrar klubbane til å laga til liknande arrangement. Sjølv om Hordaland Skikrets masar om å få datoar for arrangementa, har dei to eldsjelene erfart at det ikkje er så lett.

– Snøen kjem og går gjennom vinteren, så me hiv oss heller rundt når det kjem snø, seier Lutro.

Ho har med seg dei tre borna, Magnus på 4 år, Kristi på 9 år og Lars på snart 11 år. I fjor klarte ikkje yngstemann å koma seg opp bakken på eiga hand. I år labbar han rundt utan hjelp, sklir ned bakkane og går opp att, seier ho. Koordinasjonen er betre og det er kjekt å sjå progresjonen, seier mora.

– Grunneigarane i Åse Samdrift må få skryt fordi dei lèt oss vera her og herja i snøen. Det set me stor pris på, seier Lutro.

– Hopp er kjekkast

Lutro fortel at Ove Måge trakka løyper frå Åse til Grøningsvegen, ei sløyfe på ti kilometer, like før arrangementet starta.

Denne dagen var det laga til to små løyper. Ei løype der borna kunne skli på ski mellom portar, ein stasjon for å gå baklengs og ein for å gå på éi ski. Nedanfor huset var det trakka ei rundløype på ein flatare bakke, med postar der borna mellom anna måtte gå fiskebein eller skli baklengs.

Dei litt eldre borna laga til hopp i bakken og kasta seg utfor med slalåmski, langrennsski eller snøbrett.

– Hoppinga er det kjekkaste, seier gutane i kor.

– Eg likar best å stå på snowboard, seier Jone Skålnes Bergheim.

Ski til utlån

I år har Strandebarm Idrettslag sju par nye ski og stavar i ulike storleikar å låna vekk. Vestland Idrettskrets gav klubben pengar til å kjøpa inn utstyret, slik at born som ikkje har ski sjølve, kan få låna. Sko må borna ha sjølve, fordi skihytta ikkje eignar seg til å tørka våte skisko, seier Lutro.

Helena Bru hadde med seg borna Bella og Anton Bru Riise. Anton var med på skisprell for fyrste gong då han var 1,5 år gamal. Då gjekk han to meter på ski og vart elles boren eller sat i pulk, fortel mora. Ho seier at det er full bodkrig på alt av ski og skisko på salssider på Facebook. Sidan borna ikkje hadde ski og sko som passa, stilte dei med akebrett denne gongen. Anton hadde nemleg fått ny kjelke til jul.

Sjå fleire bilete her: