Skiskyttarane sin tur: — Eg må læra å pusta mindre

Regn, sludd og små periodar med opplett prega kvelden då Kvam Langrenn- og Skiskyttarklubb arrangerte sesongens fyrste serierenn for skiskyttarane. Utøvarane såg ikkje ut til å lata vêret påverka humøret. Før start fortalde den yngre garde at dei gledde seg til å koma i gang.

Ein etter ein vart dei sende ut i løypa av Odd Arne Botnen, som var rennleiar. Før dei ivrig la i veg, fekk dei ei påminning om at dei måtte hugsa på å gå strafferundar dersom dei bomma på standplass.

Sjå bilete frå rennet her:

Pust er viktig

Etter målgang var det ei blid og fornøgd Marita Tombra Soldal som snakka med HF sin utsending.

— Eg bomma fleire gonger, men det gjer ingenting, seier ho.

Resultatlista bekreftar at det vart tre bommar til saman på den unge skiskyttaren. Ho veit kva ho må gjera for å verta betre.

— Eg må læra å pusta mindre. Når eg pustar medan eg skyt, går berre våpenet opp og ned, fortel ho.

Også lagveninne Sunniva Henriksen Vestbø var i godt humør etter løpet. Skytinga var ho spesielt nøgd med.

— Eg bomma berre éin gong på fyrste skyting. På andre trefte eg alt! seier ho.

Medan fleire av lagvenene hennar gjorde seg godt kjende i strafferunden, kunne ho susa forbi han då ho forlét standplassen på siste skyting. Sunniva tykte at kvelden hadde vore kjempekjekk og at det heile hadde gjeve meirsmak.

Klabb og babb

Store mengder våt snø synte seg å by på utfordringar på standplass, noko som truleg fekk opp pulsen hjå ikkje berre utøvarane, men også dei frivillige på skytebana. Sjølv om løparane trefte blink, vart ikkje alle registrerte.

— Tung, våt snø hadde lagt seg på tauet. Det må ha ført til at ikkje me ikkje fekk drege blinkane heilt opp att, seier skytebanesjef Leif Mo.

Dermed gjekk truleg fleire av skiskyttarane nokre rundar meir enn dei skulle i strafferunden etter skytinga.

Etter at alle utøvarane var komne i mål, var det naudsynt med ein gjennomgang av skyteresultata. Enkelte av løparane enda såleis opp med både ekstra trim og frådrag i tid.