Skisesongen er i gang

Dei tilsette var godt førebudde, men litt overraska over kor hektisk vinterens fyrste opningsdag viste seg å verta. For sjølv med lite snø og berre to korte skitrekk i drift strøymde hundrevis til.

– Det har vore litt hektisk, seier dagleg leiar Fredrik Tønjum når han finn pusterom og tid til ein pause frå billettsal og skiutleige tysdag.

Berre to dagar tidlegare var det knapt snø å sjå i Eikedalen. Så, omsider, fall i alt kanskje tjue centimeter nysnø. Kombinert med lagra kunstsnø som vart produsert i november og lagra i haugar, heldt det til å opna Tobiasheisen og Veraheisen.

– Me kunne nok ha opna før, men då hadde det nok vorte éin opningsdag før det hadde vorte stengt att, seier Tønjum.

Også 1. nyttårsdag vert dei to minste heisane på til saman nær 500 meter opne. Vona er å kunna opna fleire til helga. Det er meldt meir snø torsdag og stabilt låge temperaturar dei neste ti dagane.

Betre snøfordeling

Drifta i Eikedalen held for det meste fram som før, men éi nyvinning har Tønjum og kollegaene å by på. Ho er ikkje av det slaget som brukarane vil merka stort til, men dess viktigare er ho for dei tilsette som har med løypepreparering å gjera.

Skisenteret har nemleg investert ikkje berre i nokre nye snøkanonar, men også i eit system for å måla snødjupne: Snowsat. Systemet gjer det mykje enklare å plassera og fordela tilgjengeleg snø – eller litt finare sagt arrondera – på fornuftig vis. Terrenget i området er skanna grundig, og det nye systemet gjev eit presist bilete av snødjupna. Føraren av trakkemaskina kan sjå korleis nivået er femti meter framom og femti meter ut til sida.

Med denne kunnskapen kan dei tilsette flytta snøen dit han trengst mest for å byggja gode løypesolar. Vona er at satsinga vil bidra til å opna løypene tidlegare og lengja sesongen.

– Korleis vil brukarane merka det nye systemet?

– Truleg vil ingen merka det. Me gjer ein del arbeid som ingen legg merke til, konstaterer Tønjum, og nemner byte av eit utal lampar i skikafeen som eit anna døme på nettopp det.

I dag urealistisk

Tønjum seier at skianlegget fungerer godt som det er, men at han gjerne skulle hatt sikrare vasstilgang i kalde periodar, gjerne med eit større basseng ved Teigaelva, for å tryggja grunnlaget for snøproduksjonen. Utfordringa er at elva er del av eit verna vassdrag. Og så lenge det er tilfellet, vil eit slikt inngrep vera temmeleg utenkjeleg.

Skisenteret hadde i fjor ei omsetning på 15,5 millionar kroner, og eit årsresultat på 4,3 millionar.

Den gamle stolheisen hadde gjort sitt og vart riven for nokre få år sidan. Skisenteret får ein del fromme brukarynske om å investera i ein ny stolheis, fortel Tønjum. Ei slik investering er så heftig – truleg nærare 100 millionar kroner – at ho ikkje vil vera til å bera om det kjem eit par dårlege vintrar. Og risikoen vil vera så stor at ein uansett ikkje vil få bankar til å stilla opp, påpeikar han.

– Det viktigaste er å halda ved like heisane våre. Det kjem nok ingen til å merka – at me har bruka éin million kroner på å vedlikehalda heisane. Men det blir som ein gamal bil: Du kan byta ut mykje, men han er likevel gamal.

Skisenteret i Furedalen på Kvamskogen har enno ikkje opna for sesongen.