Skipa til bruktdagar i Herand

– Det er kjekt om folk kan få nytte av andre sitt utstyr, og så er det veldig berekraftig, seier Hildegunn Samland.

Samland er leiar i Herand Idrettslag og ein av initiativtakarane til bruktdagane fredag og laurdag. I samarbeid med bygdelaget og nærbutikken skipa ho til arrangementet i butikken.

På førehand hadde arrangøren oppmoda lokale om å levera inn vinterutstyr som ikkje vert nytta meir. Skeiser og skisko av ulike sortar, langrennsski- og stavar og litt vinterklede var plasserte i eit område like ved inngangsdøra då HF var innom laurdag føremiddag.

Rimeleg og berekraftig

Samland fortel at det er fyrste gong gruppa arrangerer ein slik bruktdag. Målet er å gjera vinterutstyr lettare tilgjengeleg for dei som treng det, og at dei som har utstyr som ikkje er i bruk, får sjansen til å kvitta seg med det, forklarar ho.

Alt i utvalet var merkt med telefonnummer. Dei som var innom med klede og utstyr, valde sjølve om dei ynskte at pengane skal «vippsast» til dei sjølve, eller om dei ville støtta arbeidet med vedlikehald av skiløypa i Herand, seier Samland.

Ifylgje butikksjef Bergljot Eiken Berg vart det selt noko utstyr fredag. Ho fortel mellom anna at ein liten gut hadde vorte strålande nøgd etter å ha fått seg nye skisko og langrennsski. I tillegg nytta nokre besteforeldre høve til å kjøpa utstyr som dei kan ha tilgjengeleg for barneborna.

Både Berg og Samland vonar at folk kan ha glede av bruktdagar. Dei meiner det kan vera både nyttig og lurt å kjøpa brukt i staden for nytt.

– Nokre sesongar får ein gjerne brukt vinterutstyret nokre få gonger, og så har ein vakse ut or det sesongen etter, seier Samland.

– Prøver igjen

Laurdag føremiddag var det roleg i den mellombelse bruktavdelinga i butikken. Om mykje utstyr vart ståande att når dagen er omme, ville Samland og eigarane avgjera kva som skal gjerast med det, fortel ho.

– Vert det fleire bruktdagar?

– Ja, om det er interesse for det, prøver me på nytt til neste sesong, kanskje før jul, seier Samland.