Skår og Røyseth vann – men Sollesnes var best totalt

Nærare bestemt deltok 156 i Hardangerminiatyren i Vangdalsåsen og 140 i Strandebarmminiatyren i Strandebarm. Båe tevlingane var i regi av Hardanger Skyttarlag. Deltakartalet er noko lågare enn tidlegare år. Ikkje minst i klassane for dei yngste var det skrint, opplyser Hardanger Skyttarlag.

I dei fleste klassane stakk dei lokale skyttarlaga av med sigeren. Far og son, Dag og Kjetil Skår i Hardanger Skyttarlag, vart dei beste i klasse 3–5 i Hardangerminiatyren med høvesvis 347 og 346 poeng. Arild Røyseth frå Åsane/Hordvik vann i Strandebarm med 346, med Hardanger-skyttar Chris-André Bolstad Fauske på plassen bak med 345 poeng.

Sjølv om ho ikkje vann nokon av stemna, var Liv Sollesnes frå Jondal best samla med 344 og 346 poeng i klasse 3–5. Ho fekk såleis sin andre aksje i meisterskapspokalen.

Arne Berge frå same lag vann båe stemna i klasse V73 som den einaste med 350 poeng. Båe stemna vann også Kristine Solheim Wikane frå Jondal i klasse eldre junior, og Arve E. Kolltveit frå Hardanger i klasse V65. Magne Lysen vann V55 i Strandebarm med solide 349 poeng.

Vegard Eide Aase frå Hardanger vann klasse eldre rekrutt i Strandebarm. I Vangdalsåsen vart han nummer 2, poenget bak lagveninne Iselin Bjørke. Jarand Selsvik og Varg Måkestad sikra seg kvar sin siger i rekruttklassen.