Sjuar øydela for Sollesnes
Liv Sollesnes frå Jondal låg an til å kjempa heilt i toppen, men fekk ein sjuar som spolerte vinnarsjansane i dagens meistermøte i skyting.
Sollesnes starta nær perfekt med 99 av 100 poeng etter dei to fyrste seriane, og følgde opp med 49 på kneserien. Det andre skotet i «grunnlaget», i ståande stillinga, hamna i sjuaren. Sidan kom tre niarar til, noko som gav henne 243 poeng totalt og sende henne eit stykke nedover på lista.
I skrivande stund ligg Ole Kristian Bryhn frå Røyken og Hurum skyttarlag på toppen av lista. Han har 248 poeng før finalen seinare i dag.
Sollesnes var ikkje budd på å sjå ein sjuar då skota vart anviste, sjølv om ho såg at skotet gjekk ut til høgre.
– Faktisk blei eg litt overraska, for det såg ikkje slik ut. Eg hadde håpa på ein niar, seier Sollesnes til NRK rett etter skyting.
– Det er heilt greitt. Eg hadde ikkje så store forventingar, seier ho.
Meistermøtet i Oslo er ei erstatning for Landsskyttarstemnet på Elverum, som måtte avlysast på grunn av koronaviruset. Ei rekkje tidlegare «kongelege» i skyteverda er samla til dyst.
Etter at alle hadde skote, låg Sollesnes på 17.-plass av 54 deltakarar før kveldens NRK-sende finaleomgang.
