Siktar mot verdsmeisterskap

14.–15. november startar sesongen for skiskyttarane. Der skal Børve, som førre vinter vart teken ut på U23-landslaget, stilla til start i lag med senior- og elitelandslaget.

– Me juniorane vert underdogs, men eg trur me skal kunna bita frå oss sjølv om me er yngre, seier Børve.

Ho gler seg til å komma i gang med sesongen etter mange månader med trening. Sjølv om treninga er kjekk, er det konkurransane ho ser fram til.

I starten av desember byrjar noregscupen i juniorklassen. Børve konstaterer at ho har litt tid på seg til å trena seg opp til det.

– Eg er i god treningsform no, og har litt å gå på til sesongen byrjar, seier ho.

Vinteren kjem truleg til å verta annleis, med tanke på koronaviruset. Det ligg an til at ein får konkurrera stort sett som normalt, men utøvarane er innforståtte med at det kan skje endringar.

– Det vert ingen sure miner om det kjem avlysingar, men me er heldige og det ser ut som me skal få konkurrert, seier ho.

Den store hendinga i vinter er junior-VM på slutten av sesongen. Der vert konkurransen hard, slår Børve fast.

– Me er yngst i juniorklassen og konkurrerer mot utøvarar som er to år eldre. Det vert tøft, men det kan gå likevel. Men me trener jo for å verta betre om nokre år. Det er ikkje i år eg skal vera best, men dette er trening på vegen mot seinare mål.

– Men det skader likevel ikkje å prestera godt. Eg vil jo ha ut potensialet mitt her og no, seier Børve.