Sikra seg nytt NM-gull
Bjørnar Sandnes Lillefosse vart førre helg noregsmeister i terrengløp i kort løype. Sundag kunne Strandebarm-utøvaren jubla over nok ein NM-triumf då han sette noregseliten på plass i Oslo.
— Det var eit større og betre startfelt her i Frognerparken. Difor rangerer eg nok denne sigeren litt høgare. Men eg hadde helst sett at også Ingebrigtsen-brørne var med, seier Lillefosse etter å ha sikra nok ein NM-medalje av edlaste valør.
Med på kjøpet fylgjer uttak til Nordisk Meisterskap i neste månad. Det vert umogleg å koma utanom den lettbeinte legestudenten i troppen etter oppvisinga i den mest kjende parken i Oslo.
— Eg forventar å bli teken ut til Nordisk Meisterskap. Det er fullt mogleg å kvalifisera seg for europameisterskapen mot slutten av året om eg gjer det bra i Sverige. Det betyr mykje for motivasjonen at eg kan få fleire løp i haust som betyr noko, seier Lillefosse.
To som kjempa til slutt
Lillefosse tykkjer det er stort å verta noregsmeister. Samstundes kjenner han at det var ei vel så stor oppleving og prestasjon å slå krinsrekorden til Arne Risa på 10.000 meter. Han hadde stått i over 50 år då Lillefosse sprang han på 28.23 denne regntunge dagen.
— Det er ei herleg kjensle når du får ei luke til dei andre utan ein markant fartsauke. Eg registrerte at fleire fekk fartsproblem utan at eg pressa spesielt hardt. Til slutt var me i realiteten berre to som kjempa om gullet, seier Lillefosse.
Då han eit stykke ut på den siste runden fekk luke, innsåg talentet at han hadde moglegheit til å vinna.
— Sjølv om eg ikkje kjende meg trygg før eg nærma meg mål, seier Lillefosse.
EM i München
Lillefosse meiner at han ikkje har fått teke ut potensialet på friidrettsbanen. Mellom- og langdistanseløparen både håpar og trur at han har dei beste åra på banen framføre seg. Lysta og motivasjonen til å satsa har aldri vore større.
Lillefosse studerer til å verta lækjar, og trur ikkje det er mogleg å kombinera satsing på dette nivået med kvelds- og helgejobbing.
— Det kan vera ei moglegheit at eg har ei lita deltidsstilling om engasjementet er så fleksibelt at eg får gjort det eg må for å ta nye steg på trening og i konkurransar, seier Lillefosse.
Neste år er det europameisterskap i München. Det er eit arrangement han har lyst til å vera med på, sjølv om kvalifiseringskrava er monaleg tøffare enn dei har vore før. Han må springa raskare enn 8.15 for å ha moglegheit til å kvalifisera seg.
