Sikra seg åtte medaljar
Hardanger Bordtennisklubb sette sundag ny medaljerekord i ein meisterskap.
Det skjedde i veteran-NM på Stord på verdas bordtennisdag. Det går fram av heimesida til Hardanger Bordtennisklubb (HB).
Best gjekk det med Roger Andersson, som tok to NM-titlar og ytterlegare to NM-medaljar.
I herrar lag 35 stilte HB med Andersson, Kjetil Sætre og Håvard Markhus. Dei tok 3.-plassen i klassen.
Dette var fyrste gongen klubben tok medaljar i ein lagklasse i veteran-NM, ifylgje sportsleg leiar Håvard Markhus, som sjølv tok sin fyrste NM-medalje i lagklassen.
I mix dobbel 50 gjekk Andersson til topps saman med ein makker frå Bergen Pil. I herrar dobbel 35 vart det nok ein gullmedalje til Andersson saman med ein makker frå Sportsklubben Heros. Sætre tok sylv. I herrar singel 50 vart Andersson nummer 2 etter å ha tapt mot ein tidlegare landslagsspelar.
I damer singel 35 vart det bronse til Iselinn Stuve. I herrar singel 40 vart Sætre nummer 5. I same klasse rauk Markhus ut i puljespelet med knappast mogleg margin, men kom seinare til finalen i B-sluttspelet.
Jack Feng frå Hardanger Bordtennisklubb var teknisk delegat, medan klubbkamerat Jan Roger Andersson var overdomar i meisterskapen.
