Sigersdansa i Jondal
Eit hat trick av Jenny Samland snudde kampen for vesle Jondal mot store Øystese/Norheimsund i den siste kampen før ferien.
Og ikkje før var sigeren i J12-kampen 19. juni i boks og gjestene takka for kampen, så samlast dei smørblide jondalsjentene kring popanlegget for å dansa ein ekte sigersdans til smurfesongren. Dansen er elles eit fast innslag i oppvarminga til gjengen, fortel trenar Hildegunn Samland til HF.
Jondølingane låg under 0–2 halvvegs i oppgjeret mot kvemmingane, og det meste tilsa at dei sigersvande gjestene skulle få ein enkel veg til sigeren. Slik skulle det altså ikkje gå. Heimelaget, ført av nemnde, hardtarbeidande Jenny, slo hardt tilbake og sikra seg ei god kjensle i magen på veg inn i fotballferien.
Trenaren seier at det har vore ein veldig kjekk vårsesong, sjølv om det heilt som venta har svinga noko resultatmessig. Men spelarane har utvikla seg, stilt opp og stått på i dei heile ti kampane dei har spela før sommaren sidan seriestart mot nettopp Øystese/Norheimsund 11. april. Seks er spela på heimebane og fire på bortebane, mot Granvin, Solnut, Harding, Bjørgum, Eldar og Ulvik i tillegg til laget frå Kvam.
Samland fortel at jentene verkar å ha det veldig kjekt saman på trening og kampar. Nokre av dei er ikkje så mykje i lag i skuletida, men på fotballbanen finn dei verkeleg tonen med einannan.
Sjå fleire bilete frå kampen her:
HF gjer merksam på at skribenten er far til ei av jentene som spela på det tapande laget i Jondal. Red.
