Rossvolldamene i 2. divisjon gjorde det ikkje enkelt for gjestene då dei spela på heimebane laurdag. Dei vann 3 av 4 sett mot TIF Viking 3. Framme ved nettet står Kristine Eide (t.v.) og Agnethe Lie Øyri.

Siger og tap på heimebane

Laurdag spela alle seniorlaga til Rossvoll heimekampar i Øystesehallen. Best gjekk det for damene, som sikra seg 3 nye poeng i serien.

Mari Ulvund
Journalist
Publisert Sist oppdatert

Det var full aktivitet i idrettshallen i Øystese frå morgon til kveld då både damelaget i 2. divisjon og dei to herrelaga i 1. og 2. divisjon skulle kjempa om sigeren på heimebane. Fyrst ut var damene, som vann 3–1 over TIF Viking 3.

Agnethe Lie Øyri, som er ei av dei rutinerte kvinnene på laget, omtalar kampen som «litt opp og ned».

– Me spela veldig godt i dei to fyrste setta. Då var me gode på det meste, snakka saman og stod der me skulle. Me var flinke til å halda trykket oppe, seier ho.

Ifylgje Rossvoll-spelar Agnethe Lie Øyri var damene flinke til å posisjonera seg .

– Eit typisk 3. sett

Etter å ha vunne 25–13 og 25–22, tapa dei 3. sett med 23–25. Ifylgje Øyri er det ikkje uvanleg at noko sånt skjer.

– Me snakka om kvifor det er slik. Me slepper oss gjerne litt nedpå og byrjar å gjera feil. Samtidig gjer det andre laget mindre feil. Det var eit typisk 3. sett.

Utover i 4. sett klara raudtrøyene å snu den negative trenden. Frå stillinga var 18–18, vart flyten i spelet betre og feila færre, noko som førte til at dei til slutt vann settet 25–22.

Kampen mot TIF Viking 3 var den 2. for sesongen. Den fyrste kampen vann dei 3–0. Hege Buene, som er spelande trenar og lagkaptein, fortel at damene langt frå tok sigeren på forskot laurdag.

– Me møtte eit heilt anna lag enn det me gjorde sist gong, så me måtte sjå an kva me hadde med å gjera, seier ho.

Ariel Stryker-Vassnes (t.v.) og Liv Sandven spelar både på seniorlaget til damene og på U19-laget til herrane. Bak dei står Marte Torvik, som hadde mange gode sørvar laurdag.

Godt samhald

Seniorlaget har med seg tre juniorspelarar i årets sesong, Tonje Torvik, Ariel Stryker-Vassnes og Liv Sandven. Sistnemnde fortel at ho tykkjer at samspelet i gruppa er godt, og at spelarane har det kjekt saman både på og utanfor bana. Aldersforskjellen i gruppa meiner ho er positivt.

– Det er fint å spela med nokre som har meir erfaring, slår ho fast.

Både Øyri og Buene rosar lagveninnene, som dei meiner fungerer godt saman. Ekstra skryt fekk Marte Torvik.

– Ho gjorde svært lite feil og var den mest habile. Ho hadde ei god sørverekkje og torde å pressa meir, seier Buene.

Rossvoll-damene verka å halda både koken og humøret oppe gjennom heile kampen laurdag. Her får damene instruksjonar frå hjelpetrenar Bård Hogne Kjosås

– Målet er å vinna

Så langt har Rossvoll-damene vunne 6 av 8 kampar. Dei ligg på 2. plass, 6 poeng bak serieleiar BTSI 1. Målet er ifylgje Buene å halda seg i toppen og å vera med og kjempa om å vinna 2. divisjon.

– I fjor vann Strand-Ulv serien. Dei har me vunne mot tidlegare i sesongen. Det endrar seg kven som er i toppen, så me vil gjera det me kan og prøva å vinna serien, seier ho.

Sundag venta ein ny kamp for rossvolldamene. Då møtte dei Trio på bortebane. Kampen enda 2–3. Såleis sikra kvinnene seg 5 poeng i helga.

Tapa for gjestene

Ein noko tyngre dag vart det for seniorspelarane på herresida. 1.-divisjonslaget tok imot NTNUI 2. Rossvoll-herrane starta som damene og vann dei to fyrste setta med 25–20 og 25–20. Bortelaget gav dei tøff motstand, og vann dei neste setta med 25–20, 25–19 og 16–14. Sluttresultatet 2–3 førte til at heimelaget tok med seg 1 poeng etter kampen.

Herrane i 2. divisjon måtte forlata hallen utan poeng etter kampen mot BSI. Dei tapa 0–3, med settresultata 21–25, 10–25 og 9–25.

2.-divisjonslaget til Rossvoll fekk mykje å bryna seg på då dei spela mot BSI på heimebane. Her er dei godt i gang med 1. sett, som var det jamnaste.
øystese volleyball sport rossvoll volleyballklubb
Laga med Labrador CMS