Siger og tap for lokale lag
Herrelaget til både Norheimsund og Øystese spela sundag. Øystese vann, medan Norheimsund tapa.
Øystese slo Os 2 med 2–1 på Kuventræ idrettsanlegg. Denis Ljubovic Ljubovic skåra det eine målet. Det andre var eit sjølvmål.
Sigeren gjer at Øystese ligg på 9.-plass når dei fleste laga i avdelinga i 4. divisjon har spela 16 av 22 kampar. Fredag møter Øystese Flaktveit i Øystese.
Tap mot Trio
Herrelaget til Norheimsund spela mot Trio på Husnes Stadion. Kampen enda med 3–0-siger til Trio. Etter å ha spela 16 av 22 kampar, ligg Norheimsund på 7.-plass i avdeling 01 i 5. divisjon. Det er 12 lag i avdelinga. Neste kamp kjem fredag, då Juristforeningen besøkjer Norheimsund.
Tidlegare i september vart det klart at Øystese og Norheimsund skal stilla med felles A-lag til neste år. Samarbeidet har allereie byrja. 13. september melde både Gabriel Alain Ramsay, Kasper Snilstveit Lundervik, Jakob Myhre og Marcus Dalseide overgang frå Norheimsund til Øystese.
– Fryktar nedrykk
Øystese-trenar Christian Kjosås fortel at målet med overgangane er å styrkja Øystese i kampen mot nedrykk.
– Samarbeidslag kan ikkje spela i same divisjon. Dersom Øystese rykkjer ned til 5. divisjon, vil Norheimsund verta flytta ned til 6. divisjon. Me skal sjølvsagt ikkje tømma Norheimsund for spelarar slik at dei rykkjer ned, men akkurat no ligg Norheimsund trygt midt på tabellen, medan me kjempar i botnen, seier han.
Kor mange lag som rykkjer ned frå 4. til 5. divisjon, kjem an på kor mange lag frå Hordaland som rykkjer ned frå 3. til 4. divisjon.
– Det ser ut til at dei fleste laga skal halda seg i divisjonane. Då rykkjer berre dei to nedste laga i vår avdeling ned. Men ting kan endra seg brått i fotball, seier Kjosås.
