Siger før sommaren
Øystese/Norheimsund har spela sin siste kamp før ferien, og kan møta sommaren med eit smil.
Samarbeidslaget tok med andre ord 3 nye poeng i fotballens 5. divisjon onsdag kveld.
Motstandar Telavåg fekk kjenna smaken av det sure eplet allereie etter 18 minutt, då Anders Botnen stod for kampens 1. mål. Men ettersmaken sat ikkje lenge. 3 minutt seinare utlikna Telavåg-spelar Martin Cindahl, før Samuel Skåre sikra kvemmingane leiinga att 10 minutt før pause.
HF var ikkje til stades på kampen, men etter dei gule korta å døma gjekk det heitt føre seg på grasmatta etter turen i garderoben. Domar Per-Johan Pileberg Aahjem delte ut heile 4 gule kort – 3 av dei til Øystese/Norheimsund – mellom det 56. og det 63. minuttet. Nok eit kort vart delt ut til kvemmingane etter 87 minutt.
4 minutt på overtid sette innbytar Are Tvedterås Fagervik på heimelaget ballen i mål og punkterte kampen.
Øystese/Norheimsund ligg på 4.-plass med 17 poeng etter 10 kampar. 1. kamp etter ferien er 16. august heime mot Nest-Sotra, som i dag ligg øvst på tabellen med 22 poeng. Nest-Sotra har spela 1 kamp færre, og skal møta Varegg 2 på bortebane før ferien.
