Set store planar om liten golf ut i livet
Strandebarm Idrettslag er i gang med å byggja minigolfanlegg. Målet er å skapa ein samlingsstad for både lokalbefolkninga og besøkjande.
Ideen om å byggja eit slikt anlegg kom hausten 2021. Ikkje lenge etter hadde Kvam herad stilt arealet til disposisjon.
Prosjektet er tildelt 75.000 kroner frå Sparebanken vest og 50.000 frå grendeutvalet i Strandebarm. I tillegg har idrettslaget fått gåver frå privatpersonar.
Dei ni banane ligg ved idrettsparken i Strandebarm, nord for Kløverparken, og med god utsikt mot fjorden. Norges Minigolf Forbund vart kontakta for å finna ut korleis ein skulle byggja mest mogleg slitesterkt og solid. Materialvalet landa til slutt på rustfritt stål og betong.
Primus motor Olav Sletvold i idrettslaget er involvert er med å arrangera dugnadsarbeidet.
— Det er mange som stiller opp og ynskjer å bidra. Me er heilt avhengige av god dugnadsånd og har mange personar å takka, seier han.
Anlegget er venta å vera klart til bruk i juni. Lokalbefolkninga er positiv og følgjer nøye med på framgangen, fortel Sletvold.
Han håpar å skapa eit miljø for minigolf og planlegg både turneringar, familiegolf og golfkafé. Tanken er at ein kan leiga kølle og betala om lag ein hundrelapp for å spela. Anlegget skal få lys og trapper, og skal nyttast som ein samlingsplass for folk i alle aldrar.
