Sesongopning på Kvamskogen: – Skikkeleg moro!

– Det er skikkeleg moro! Dette har me gledd oss til, seier Silja Bakke Aksnes.

Ho var ein av fleire som hadde teke turen frå Vikøy til Furedalen onsdag føremiddag. Aksnes fortalde at ho gledde seg til ein dag i bakken saman med fleire klasseveninner. Medan ho og eit par av veninnene nyleg hadde kome på plass, hadde to av dei vore der sidan trekket byrja gå klokka ti.

– Me var på plass då det opna. Då hadde me løypene mest for oss sjølve, fortel Mia Rosalia Aslaksen.

Jentegjengen på fem hadde alle sesongens fyrste dag på «nedoverski». Å henta fram att gamle kunster etter mange månader utan ski på beina, var inkje problem, ifylgje dei unge friskusane.

– Kva er det aller kjekkaste å gjera?

– Å skli i skogsløypene! Det er der me er mest, seier Mari Fosso.

Sjå bilete frå skianlegga onsdag her:

Kontroll på plassen

Dei fem kvammajentene var langt frå dei einaste som nytta høvet til å få med seg sesongopninga. Opphaldsvêr og ei lita minusgrad verka å lokka fram både store og små. Medan dei fleste var å sjå med ski og snøbrett på beina, hadde nokre drege fram akebretta. Dei måtte koma seg til topps av eiga maskin.

Trym Gauteplass Skår og Kasper Botnen såg til at alt gjekk fint føre seg på parkeringsplassen. Då klokka nærma seg tolv, opplyste dei to vaktene at dei hadde god kontroll.

– Då det opna, kom det ein del bilar ganske tett. No kjem dei litt etter litt, seier Skår.

– Kom i mål

Dagleg leiar Jan Guttorm Skeie i Furedalen hadde ikkje eit nøyaktig tal på kor mange gjester det hadde vore i anlegget onsdag ettermiddag, men han var godt nøgd med sesongopninga.

– Det har vore ein bra dag med nysnø og godt føre. Det byrjar å verta nokre år sidan me sist opna i romjola. Me ynskjer å opna så tidleg som mogleg kvart år, så det er kjekt at me kunne gjera det i år, seier Skeie.

Dagane før opninga har vore travle, ifylgje Skeie. Han fortel at spesielt dei som har ansvaret for å preparera løypene, har jobba iherdig for å få alt klart.

– Nesten døgeret rundt har dei jobba på skift for å fordela all kunstsnøen som er produsert. Det har vore ein del arbeid, men me kom i mål, seier Skeie.

Den daglege leiaren vonar å kunna halda anlegget ope på dagtid til og med fyrste nyttårsdag.

– Me får berre kryssa fingrane for at nedbøren som er meld, vil koma i form av snø, seier han.

– Ein god start

I Eikedalen kom det folk jamt og trutt utover føremiddagen. Kring tusen personar var på plass i anlegget midt på dagen, opplyser dagleg leiar i Eikedalen Skisenter AS, Fredrik Tønjum.

– Det er aldri fullt i eit skianlegg, men det er ein god del folk. Det fører til noko kø, men det er ikkje til å unngå, seier Tønjum.

Senteret hadde fyrste opningsdag andre joledag. Då var kring fire hundre innom. Onsdag var utan tvil den beste dagen, ifylgje den daglege leiaren.

– Det byrja med regn og snøvêr dei fyrste dagane. I dag er me langt heldigare, seier han.

Ifylgje Tønjum har årets sesong hatt ein langt betre start enn dei siste åra. Han fortel at det ikkje har vore så mykje natursnø så tidleg i sesongen sidan 2018.

Sidan måndag har det kome tretti centimeter nysnø, fortel Tønjum. Onsdag var fire av åtte trekk opne. Med litt hell og nedbør av rette sorten vonar den daglege leiaren at det vil vera mogleg å opna to trekk til i løpet av romjola.

– Korleis er det å vera i gang med sesongen?

– Det er veldig kjekt. Og det verkar som det er fleire som synest det. Sjølv om det er litt kø, så er det mange som har teke turen ut og får seg frisk luft, seier Tønjum.