Sesongens fyrste serierenn
Vel 90 born og vaksne stilte til start då årets fyrste serierenn gjekk av stabelen på Sjusete måndag kveld.
Rennleiar Silje Laupsa Mo tykte det var godt oppmøte til å vera årets fyrste, spesielt sidan det var så kaldt.
– Grensa er minus 15, så eg var litt spent på det. Men det var aldri meir enn 12 minus, og dei fleste var godt kledde, seier Mo.
– Korleis var føret?
– Det vert litt tregt når det er så kaldt. Men det er ikkje sikkert det var så tregt, om du ser på tidene. Eg tippar folk gjekk fort for å halda varmen, seier Mo.
Mo tykkjer det er skikkeleg kjekt å sjå så mange flinke born og så mykje skiglede på éin plass. Yngste deltakar hadde nett fylt tre år. Det er skikkeleg kjekt å arrangera, synest ho.
Løypene vart trakka like før rennet. Elles vart det ein del kø og venting. Det er «alltid» litt kaos på det fyrste serierennet. Det vert sett ein frist for påmelding, men det kjem uansett folk fem minutt før start, seier rennleiaren. Det var òg nytt system på plass for påmelding. No vert løysinga «EQ timing» brukt. Det fungerte veldig bra. Det er den same løysinga som vert brukt på skiskyting og større renn. Det gjer at folk heime kan fylgja med på tidene.
– Er det berre å melda seg på for kven som helst?
– Me ynskjer at flest mogleg er medlem, men alle er alltid velkomne på Sjusete, seier Mo.
Serierenna i langrenn har fellesstart i dei yngste klassane, og individuell start for dei eldre. Alle under 11 år går i valfri stil. For dei eldre vil stilen variera mellom klassisk og skøyting. Måndag var det skøyting.
Deltakarliste og resultat er tilgjengelege her.
