Sesongen er endeleg i gang!

Då HF parkerte i Eikedalen, viste gradestokken ei minusgrad. Bilar kom på rekkje og rad, og dei fyrste personane var allereie i bakken. At dette var noko folk hadde venta på, var det ingen tvil om.

Sesongen starta med kveldskøyring både i Eikedalen og Furedalen fredag. Fredag kveld melde Eikedalen Skisenter at laurdagen var utseld, og laurdag føremiddag melde Furedalen Alpin det same.

I Eikedalen er fire av åtte heisar opne. Meir snø er naudsynt før dei siste fire heisane kan opna. Snødjupna ligg på rundt ein halv meter i terrenget hjå begge skisentera.

Alle er med

Hallvard Bjørke var ein av dei som tok borna med seg i skibakken laurdag.

— Ein rampenisse hadde lagt igjen nokre årskort i jula, og så då lyt ein nytta på, seier Bjørke.

Også Guro og Rune Øvsthus Kolltveit har investert i årskort til familien. Guro seier at dei har gledd seg like mykje, alle saman.

— Det var vel mor som var mest gira i starten, men no er alle med. Det er moro å kunna finna på noko med heile familien, seier ho.

Ei stavlengd

I år er det førebels ingen restriksjonar når det gjeld tal på folk i skibakken. Bransjeorganisasjonen Norske alpinanlegg og fjelldestinasjoner har utarbeidd ein smittevernrettleiar i samarbeid med Folkehelseinstituttet og Helsedirektoratet. I hovudsak vert det anbefalt å bruka munnbind om ein ikkje kan halda avstand i skiheis, heiskø og ved samlingar utandørs.

Kravet om avstand er ikkje forskriftsfesta, men ei tydeleg anbefaling også utandørs, står det i smittevernrettleiaren.

Dagleg leiar Jan Guttorm Skeie i Furedalen Alpin er ikkje veldig uroa over smittevernet.

— Det har vore lange køar i dag, og det ser litt tett ut om ein står ved varmestova og ser. Men ser ein køen frå sida, er det ikkje gale. Eg synest kundane fortener skryt, seier Skeie.

Han anslår at rundt 1.400 personar tok turen laurdag.

— Korleis kjennest det å ha opna?

— Det er alltid godt! Det er godt å koma i gang, seier Skeie.