Samlast i skitrekket

Almeland har drive med alpint sidan ho var lita. Ifølgje henne var det rart å stå på ski om sommaren dei fyrste gongane, men no er ho van med det.

– Det er sommarstemning å vera på Fonna. Når me er ferdige for dagen, reiser me ned og et is på ferja, fortel Almeland.

Vert kjend med mange

Familien bur i Kvam og pendlar til Fonna kvar dag når det er samling. Almeland tykkjer det er kjekt å driva med alpint.

– Det stas når ein klarer nye ting. Og så vert ein kjend med mange på same alder, fortel ho.

Deltakarane på samlinga kjem frå klubbar i skikrinsane Agder og Rogaland, og Hordaland. Almeland er med i alpingruppa til Samnanger Idrettslag og deltek i klasse U16.

Dette var samling nummer fire av seks i årets sommarsesong. Ungdomane trena på både storslalåm og slalåm. Kvar samling har ulike tema. Denne gongen skulle deltakarane jobba med å ha stabil overkropp og lata beina «arbeida».

– Det er vanskelegast i slutten av løypa, for der er det mjuk snø og mange store groper, seier Almeland.

Del av lag

Samlinga varte frå laurdag til tysdag, og var delt i to økter om dagen. Deltakarane starta med nokre oppvarmingsrundar, før dei køyrde gjennom løypene med bestemte oppgåver. Så var det pause, før dei gjekk i gang med økt nummer to.

– Det er veldig kjekt å vera på samling! seier Almeland.

Ifølgje henne tenkjer mange at alpint er ein individuell sport. Der er Almeland usamd.

– Eg kjenner meg som del av eit lag. Sporten er veldig sosial, og me heiar alltid på kvarandre i konkurransar, fortel ho.

Konkurransane går føre seg på vinterhalvåret. Då deltek Almeland i både krinsmeisterskap og landsfinale.