Samla jentene til lan

Lanet – eller LAN-et eller lokalnettet – i lokala til Kvam E-Sport varte i 24 timar frå klokka 14 tysdag til klokka 14 onsdag. Her fekk dei som ville det, leika, prata, eta, drikka brus og ikkje minst spela.

Fleire av jentene som var med, er med på vanleg jentegaming. Det er kjekkare med lan, meiner jentene Olivia Brattli Tolo (10), Kristin Valland Nordheim (10), Julia Valland Røen (10) og Eline Skeie Langesæter (11).

Jentene synest dei får gjort meir på eit lan enn på ei vanleg trening. Det er òg kjekt med gratis pizza og å kunna gå ned til butikken og kjøpe seg mellom anna godteri og frukt.

Fleire jenter

Kvam E-Sport hadde 27. januar open dag for alle jenter. På arrangementet kom over 30 jenter som gledde seg til ein heil dag med speling utan gutar. Den komande tysdagen var det første jentetrening, og etter ein knapp månad vart det altså arrangert eit eige jente-LAN.

Nyvald styreleiar i Kvam E-Sport, Hallvard Valland Nordheim, og trenar for jente-e-sporten, Halfdan Hansen, seier at før jentegaminga var null jenter på vanleg e-sporttrening, og at det møtte kanskje tre–fire på «hangout». På eit vanleg lan har kanskje mellom null og fem av rundt 90 vore jenter, fortel dei.

Men allereie på den fyrste jentetreninga var over 15 med. Den positive responsen førte til at klubben arrangerte eit lan for berre jenter.

Kva synest så jentene om eit eige jentelan? Dei fleste av jentene meiner det er kjekkare utan gutar. Anna Norheim seier at det er mindre press på kva ho speler når det er ingen gutar og at det vert meir som ein liten gjeng som «tenker likt».

– Dei seier ting som «spelar du Roblox?», liksom, seier Kristin Valland Nordheim.

Gutane bråkar og det vert ofte fulle lokale, meiner andre.

Heilt frå Oslo

Hanna Byrbotten og Maja Ruud, som i lag driv @gamergaels på Instagram, tok den lange turen frå Oslo og Bergen for å verta med på jentelan. Jentene er kjende for å ha oppretta ein server berre for jenter, laga under aliaset «Gamer Gæls». Serveren er for alle jenter over 16 år som liker å spela. Sjølve liker jentene å spela Grand Theft Auto, Counter-Strike, Apex Legends og Euro Truck Simulator.

Fleire av dei yngre jentene seier at dei ikkje har møtt masse mobbing på nett. Men «gamergaelsa» og fleire av dei andre eldre spelarane møter noko anna når dei spelar. Dei seier det har å gjera med kva spel som vert spela. Det er meir mobbing i «competitive» spel, altså konkurransebaserte spel, fortel gjestene frå Oslo.

Jentene seier òg at alle vert mobba på nett – det er berre at jenter vert mobba for kjønnet i staden for spelinga. Anna Norheim liker å spela og meiner det er viktig å ikkje høyra på dei som stereotyperer etter kjønn.

– Det er viktig at jenter får same tilbod. Me klarer å tenka at damer kan vere tømrar og menn vera frisør. Det er 2024.