Rullande moro i Vikøy

I strålande haustvêr deltok 35 frå fem ulike klubbar. Den yngste deltakaren var fire år, medan den eldste var 72 år.

Styreleiar og eldsjel i Hardanger Skøyteklubb, Brynjulf Måkestad, var eldstemann med rulleskøyter som framkomstmiddel. Han er nøgd med arrangementet.

– Det er bra at det kjem så mange. Dette er kjempekjekt, seier Måkestad.

Nyleg fornya

I tillegg til løparane var trenarar, familiar og frivillige i full sving. Sekretær i skøyteklubben, Evelyn Lund, serverte gratis pølser med brød til alle som ville ha. Ungane leika på leikestativa i solskinet medan dei venta.

Speaker Georg Wiik ropte opp ein etter ein til startstreken. Der stod Jarle Storli klar med startflagget. Kring 15 frivillige var i sving for å gjennomføra arrangementet.

Arenaen har fått nytt grindbygg, lysmaster og nye sikringsputer i svingane. I tillegg er banebreidda utvida frå 3 til 4,6 meter. Måkestad skryter av den nye rulleskøytebanen og poengterer at den utvida banebreidda gjer at løparane kan rulla fortare. Han vonar at fleire vil koma og prøva seg.

Banksjef May Turid Tømmervik i Sparebanken Vest skrytte av arbeidet som er gjort med det fornya anlegget, og overrekte skøyteklubben eit tilskot på 40.000 kroner.

Konkurransar for alle

Med stort spenn i alder var det dei yngste som hadde flest å konkurrera mot. I rekruttklassen, for løparar opp til ti år, var det flest deltakarar. I dei eldste klassane var det éin eller to deltakarar.

Hardanger Skøyteklubb, Austrått IL, Fana IL, Bergen SK og Skuteviken SC var representerte. Distansane ein kunne melda seg på, var 250 meter, 500 meter, 1.000 meter og 3.000 meter. Deltakarane kunne melda seg på to distansar kvar.

Aleksander Bredesen frå Hardanger Skøyteklubb var klar for å gå ein runde på 250 meter. Han fekk to forsøk på å slå sin eigen rekord. Guten var einaste deltakar i konkurranseklassen gutar 11 år. Med ein arm på ryggen og stor fart kom han i mål på 35,10 sekund.

– Det var kjekt å gå. Eg skulle kanskje hatt ei anna bukse, fortel Bredesen.

Hardanger Skøyteklubb viste godt att på deltakarlista med sine 17 deltakarar. Jarle Garen gjekk 250 meter i klassen menn veteran 50–55 år. Då han kom i mål, tok han ein runde til. Stoppeklokka tikka likevel inn tida til 42,69 sekund. Linda Hultvall frå Hardanger Skøyteklubb utgjorde heile kvinneklassen. Ho deltok i kvinner veteran 45–50 år, og gjekk 250 meter og 3.000 meter. Ho kom i mål på tidene 32,59 sekund og 7 minutt og 16 sekund.

Fana IL var representert i fleire konkurranseklassar. Med seg som trenar hadde klubben tidlegare verdsmeister og olympisk meister i skeiser, Sverre Lunde Pedersen. Han byrja nyleg i jobben som trenar, og ser fram til å arbeida vidare med juniorane i klubben. Den tidlegare verdsmeisteren tykkjer baneforholda var gode.

– Det er fantastisk å sjå kva dei har fått til her. Me skulle hatt fleire slike arenaer i byane, seier Pedersen.

Resultat frå tevlinga finn du her: