Rossvoll: Siger for damene, tap for herrane

Det var duka for 2 kampar på rad for seniorlaga til Rossvoll Volleyballklubb i Øystesehallen laurdag. Fyrst ut var kvinnene, som slo Trio 3–1 i den nest siste kampen i årets sesong.

Vann formalitetssett

Den eine settsigeren til bortelaget skuldast faktisk ein formalfeil. Den eine spelaren som var i aksjon for heimelaget, var nemleg ikkje ført på kampskjemaet av heimelaget. Trio varsla domarane om tabben.

Konsekvensen var at resultatet i det 2. settet, som Rossvoll eigentleg vann, vart sett til 25–0 til gjestene, og at den aktuelle spelaren måtte sjå resten av kampen frå tribunen.

– Me dreit oss ut, rett og slett. Det var kjedeleg for henne, seier Agnethe Lie Øyri, ein av 10 korrekt loggførte spelarar i Rossvoll-troppen.

Ser ein bort frå formalitetsbrølaren, kosa ho og medspelarane seg mot Trio. Dei siste setta vart mykje jamnare enn dei fyrste; Rossvoll vann desse høvesvis 28–26 og 25–23.

– Det var ein kjekk kamp med lange ballvekslingar og godt spel i båe lag. Både me og Trio var einige om det etterpå. Sjølv om me drog det i land, var det ingen enkel kamp, seier Øyri.

Treng ung hjelp

Ho fortel at frammøtet på serniortreningane har variert ein del. I den siste av dei to treningstimane har spelarar frå U17- og U19-laga difor trena i lag med kvinnelaget.

– Det har vore kjekt å kunna samarbeida med dei yngre. Me er heilt avhengige av dei, for me er ikkje mange nok seniorspelarar. Det er veldig kjekt når dei tek steget opp, seier Øyri.

Rossvoll har berre éin kamp att i år, mot BSI 2. Det er uvisst når han vil verta spela. Kvemmingane rykkjer truleg korkje opp eller ned etter sesongen.

Kamp mot nedrykk

Medan damene altså kunne jubla, enda Rossvoll-herrane i 1. divisjon med det spelande trenar Jon Erlend Haukås kallar eit «overbevisande tap» mot ein sterk motstandar i helga. Laget tapa 3 av setta med god margin og plukka høvesvis berre 13, 15 og 17 poeng sjølv, men vann på den andre sida sett nummer 2 relativt klart med 25–19.

– Viking var knallgode. Me starta veldig rufsete i fyrste sett. I det andre settet fann me ein god rytme, kom oss inn i kampen og hadde god kontroll, før me rota litt på slutten, men drog det i land. Me kunne ha vunne settet endå klarare, seier Haukås.

Etter den mellombelse oppturen fylgde altså ytterlegare to svake sett, utan at Haukås kan forklara tilbakefallet. Ei mogeleg forklaring er at laget manglar fleire sentrale spelarar, mellom andre beinbrotsråka Amund B. Madsen.

Haukås vil som vanleg studera kampen i opptak for å sjå kva laget må ta tak i før neste kamp.

– Det er mykje å jobba med, men me visste jo at me møtte eit tøft lag, seier han.

Håpar å bli

Rossvoll ligg ikkje trygt plassert på tabellen i 1. divisjon. 2 lag rykkjer ned, men laget som ligg nedst, ToppVolley Norge 2, tel ikkje med i sluttoppgjeret og kan ikkje rykkja ned. Den lagnaden går i staden truleg til Sarpsborg på plassen over jumboen, medan Rossvoll er det eine av 4 lag står i fare for å enda nest sist av dei som kan falla eitt hakk.

Den siste serierunden, med kampar mot Oldenborg, Sarpsborg og OSI i Oslo 15.–17. mars, vert særs viktig i så måte. Haukås seier det hadde vore eit stort steg i feil retning å rykkja ned til 2. divisjon. Laget har ein fin gjeng med spelarar som har utvikla seg saman sidan dei var 10–12 år gamle, og som framleis er på veg opp.

– Det vil bremsa utviklinga om me rykkjer ned, seier trenaren, som sjølv er mellom dei beste poengplukkarane og sørvarane i divisjonen.

Før osloturen har herrane ein siste heimekamp. 3. mars kjem topplaget NTNUI 2 til Kvam.