Rossvoll og Framnes til NM
Tre unge lag frå Kvam avanserte frå regionmeisterskapen i U19 i volleyball.
Dimed er kvemmingane frå Rossvoll Volleyballklubb og både jentelaget og gutelaget frå Framnes klare for noregsmeisterskapen (NM) i Førde i mars.
I NM-kvalifiseringa, som gjekk føre seg i Sotra Arena i helga, slo Rossvoll Kronstad 2–0, Gneist 2–1, Strandvik 2–0 og den lokale rivalen Framnes 2–1 i semifinalen.
– Me var gode til å halda fokus og til å halda hovudet kaldt då det galdt, seier rossvollspelar Liv Sandven.
Ho er ei av to jenter som spela på lag med gutane. Trenar Samson Håland opplyser at årsaka er at mange av jentene som vanlegvis spelar, går på skule i USA. Difor måtte dei som er att, spela med gutane. Men det er berre tillate med éi jente på banen om gongen, seier Sandven til HF.
Ho seier at det var kjekt både å spela og sjå på kampane mot andre lag frå Hordaland. Ho fortel at 13 spelarar var med på laget.
– Det er kjekt at alle som er med på trening, får spela, seier ho.
– Kjempehøgt nivå
Finalen mot TIF Viking enda med tap. Sjølv såg Sandven kampen frå sidelina. Berre dei beste fekk spela finalen, ifylgje ho.
– Begge trenarane sa etterpå at det var kjempehøgt nivå på begge lag. Det var eit surt tap, men det var spanande, seier ho.
For henne er det sosiale viktigast. Ifylgje Sandven har laget trena saman sidan byrjinga av ungdomsskulen. Ho seier at det er artig å gjera noko i lag med venene, og at volleyball er kjekt fordi det alltid skjer noko. Om ein tapar poeng, må ein berre halda fram.
Sidan det er 14–15 spelarar på laget, og berre seks spelarar på bana i ein kamp, er Sandven usikker på om alle får vera med til NM. Det avgjer trenarane, seier ho.
To lag frå Framnes
I tillegg til laga frå Rossvoll og Framnes Idrettslag gjekk finalevinnar TIF Viking vidare til NM.
– Det er veldig artig at laget frå Framnes kvalifiserte seg òg, seier Liv Sandven.
Gutelaget til Framnes, der mellom andre Markus Straumstein spelar, slo Kvernbit 2–1, Askøy 2–0 og Sotra 2–0, tapte mot Rossvoll i semifinalen og vann 2–1 over Kvernbit i bronsefinalen.
Framnes stilte også med eit lag i jenteklassen, der mellom andre Otilie Bjelland Sætrenes spela. Laget vann over alle det spela mot fram til finalen. Jentene slo Sotra 2–0, Gneist 2–1, Sveio 2–0, Strandvik 2–0 i kvartfinalen og Gneist 2–1 i semifinalen, før dei tapte 0–2 for Strand-Ulv Idrettslag i finalen.
– Jentene måtte bli mellom dei to beste. I finalen tapte dei mot Strand-Ulv, som er veldig gode, seier lærar Martin Dalane ved Framnes Kristne Vidaregåande Skule.
