Rossvoll-herrane er ute av NM
Rossvoll VBK møtte tøff motstand i 8.-delsfinalen i NM torsdag kveld.
Sjølv med ein lyssett og showaktig presentasjon av spelarane og ein god start på kampen enda NM-draumen med eit 0–3-tap for volleyballkarane. Motstanden vart for tøff.
Heimelaget, som vann den fyrste NM-runden 3–2 over Kvernbit, låg stort sett på same nivå som motstandarane fram til om lag 10 poeng. Midt i alle setta rakna spelet, og TIF Viking drog frå.
– Dei tok mange poeng på rad på same sørvar. Men i periodar spela me veldig bra. Eg føler sjølv at tala lyg litt samanlikna med korleis me spela. Me spela ein veldig god kamp, seier spelande trenar, Jon Erlend Haukås.
I serien har laget spela to kampar så langt. Fyrst NTNUI 2 30. september, og Lierne IL dagen etter. Rossvoll tapa begge kampane 0–3.
Fjoråret var den fyrste sesongen for laget i 1.-divisjon. Då var målet å halda seg der. Det same målet er sett i år, seier Haukås.
– Dette vert ein kjempetøff sesong for oss, så viss me held plassen, skal me seia oss veldig nøgde! seier trenaren.
I vår avslutta Rossvoll sesongen med 5.-plass.
Sjå fleire bilete frå kampen her:
