Romjul i slalåmbakken
Mange som er glade i fart og spenning, har nytt godt av snøen som kom i slutten av desember. Skitrekket i Furedalen har fått ein god start på sesongen.
Temperaturen ligg rundt 15 kuldegrader når HF er innom Furedalen Alpin for å sjå korleis stoda er. På parkeringsplassen står ei vakt i blå termodress, refleksvest og tjukk vinterhue. Eskil Storm Eikrem er i gang med sin andre arbeidsdag i skitrekket.
– Det er veldig kjekt med mykje snø og gode løyper, fortel han.
Sjølv er Eikrem svært glad i å stå på ski. Favorittløypa er på «venstresida» – der er det brattast. Ungdomane som arbeider i Furedalen, byter på oppgåver i løpet av dagen. Dei kan til dømes vera parkeringsvakt, plukka bos eller hjelpa med å hekta folk på krokar i skiheisen.
Eikrem fortel at det er litt kaldt å stå parkeringsvakt. Bortsett frå det er han nøgd.
– Ein har heile tida ting å gjera her. Det er ein veldig kjekk jobb, fortel han.
Både kunstig og naturleg
Også driftsleiar Eirik Mo er på jobb denne romjulsdagen. Han har ansvar for at heisar, løyper og alt det tekniske fungerer som det skal.
– No går det veldig fint. Alt verkar, så det er bra, fortel han.
Ifølgje han var tanken å opna trekket helga før julaftan. Planen gjekk i vasken då mildvêret kom og regnet skylde vekk all den naturlege snøen.
– Me måtte utsetja opningsdagen til veslejulaftan. Det er viktig for oss å halda ope i juleferien, seier Mo.
Då snøen fyrst kom, bygde det seg fort opp ein meter. I botnen av alle løypene er eit lag med kunstig snø. Ifølgje Mo gjev dette fleire fordelar. Om den naturlege snøen blæs av, ligg kunstsnøen att. Dermed er det ikkje fare for å køyra på ein stein på veg ned bakken.
– Kunstsnøen er hard og kompakt. Han jamnar ut terrenget og fungerer som ein god sole i løypene, fortel Mo.
Radioprat
Dagleg leiar i Furedalen Alpin, Jan Guttorm Skeie, fortel at mykje snø på ein gong fører med seg ein del arbeid. Likevel tykkjer han det er viktig å fokusera på det positive.
– Me vil heller ha snø enn regn, seier Skeie.
Skisenteret har hatt over seksti driftssesongar. Ifølgje Skeie er det jamt fordelt om trekket har opna før eller etter nyttår.
– Nokre år har me ikkje opna før godt ut i januar, eller i verste fall i februar, fortel han.
Denne romjula har anlegget har ein god start. 18 ungdomar er på jobb kvar dag. Skeie fortel at dei hadde ein opplæringsdag tidlegare i desember.
– Det er mange nye ungdomar i år, men dei tek ting fort, seier han.
Intervjuet vert avbrote av skurring i ein walkietalkie. Skeie forklarer at dei tilsette nyttar slike handhaldne radioar for å kommunisera med kvarandre.
– Viss det er noko, må ungdomane få tak i oss vaksne, fortel han.
Eikedalen Skisenter opna noko tidlegare enn anlegget i Furedalen, og melde fredag om ein meter med snø og fine tilhøve.
